Maxaa ka jira in dowladda ay musharaxiinta qaarkood u diiday warqadda CID-da?

[Deeq A.]

Muqdisho (Caasimada Online) – Taliyaha ciidamada Booliska Soomaaliyeed, General Cabdi Xasan Maxamed (Xijaar) oo sidoo kale ah guddoomiyaha guddiga amniga doorashooyinka ayaa markii u horeeyay shaaciyey inaysan jirin Musharax la siiyey warqada CID-da ee dembi la’aanta.

Taliye Xijaar oo u waramayey warbaahinta dowladda ayaa sidoo kale waxa uu beeniyay inay jiraan Musharaxiin Mucaarid ah oo loo diiday in la siiyo waraaqda dembi la’aanta, xili ay soo baxeen warar sheegaya arrintaas.

“Cid aan siinay waraaq (dembi la’aanta ee CID-da) horta ha lasoo helo, taasi waxay ku tuseysa inaysan jirin cid la siiyey, cid loo diideyna aysan jirin. CID-da wey tageen dad badan oo musharaxiin ah oo raba inay tartamaan,” ayuu yiri Taliye Xijaar.

“Anaga waxa aanu ku shaqeyna nidaam dowli ah, Siyaasiyiin ma nihin, waxaanu rabnaa wax walba oo qabaneyno sida lagu heshiiyey inay ogyihiin Golaha Wada-tashiga Qaranka oo gacanta ku hayaan.”

Ugu dambeyntiina waxa uu carabka ku adkeeyay in muwaadin kasta oo Soomaaliyeed uu xaq u leeyahay inuu helo waraaqda dembi la’aanta ee CID-da, haddii uusan dalka dembi ka gelin, sida uu hadalka u dhigay.

Hadalka Taliyaha ayaa imanaya xili ay maalmihii dambe soo baxayeen warar sheegayey in Musharaxiinta ka tirsan kuwa mucaaridka laga hor-istaagay inay helaan warqada dembi la’aanta ee CID-da.

The post Maxaa ka jira in dowladda ay musharaxiinta qaarkood u diiday warqadda CID-da? appeared first on Caasimada Online.