Odayaasha Koonfur Galbeed oo SHURUUD adag ku xiray doorasho dhacda + Video

[Deeq A.]

Baydhaba (Caasimada Online) – Qaar ka mid ah odayaasha dhaqanka deegaanada maamulka Koonfur Galbeed Soomaaliya ayaa shaaciyey in deegaanada maamulkaas aysan doorasho ka dhici doonin ilaa lasoo daayo Sheekh Mukhtaar Roobow Cali Abuu Mansuur oo ku dhawaad seddax sano u xiran Taliska Madaxweynaha waqtigu ka dhamaaday Maxamed Cabdullahi Farmaajo.

Odayaahaan ayaa soo saaray shuruudo ay ku xireen in K/Galbeed lagu qabto doorasho, waxaana shuruudahaas ka mid ah in la siidaayo Mukhtaar Roobow iyo in ra’iisul wasaare guddi xaqiiqo raadin iyo dib u heshiisiin ah uu u diro deegaanada K/Galbeed oo sida ay sheegeen xaalad cakiran ay ka jirto tan iyo markii hoggaanka maamulkaas loo dhiibay Madaxweyne Cabdicasiis Lafta Gareen.

Malaaq Ilyaas oo ka mid ah odayaasha dhaqanka ee deegaanada dowlad goboleedka K/Galbeed oo la hadlay BBC ayaa faahfaahin ka bixiyey shuruudaha ay ku xireen doorasho ka dhacda deegaanada maamulka K/Galbeed iyo doonistooda siideynta Mukhtaar Roobow oo Muqdisho ugu xiran arrimo siyaasadeed.

“Sheekh Mukhtaar ma xirna ee waa afduuban yahay, sababtoo ah illaa hadda maxkamad lama hor geyn, cadaaladna ma uusan helin, isagoo musharax ah ayaa la afduubtay, shuruudahaana waxaan u soo saarnay in doorasho xor ah aysan ka dhici doonin K/Galbeed, dhibaato badan ayaa jirta, ninka meesha fadhiyana dhiig ayuu ku fadhiyaa,” ayuu yiri Malaaq Ilyaas oo odayaashaas u hadlay.

Sidoo kale Malaaqa ayaa ra’iisul wasaare Rooble ka codsaday in guddi farsamo loo diro arrimaha ka jira K/Galbeed oo dib u heshiin deg deg ah la qabto. Isagoo ku goodiyey in dagaal aan la huri doonin, hadii ficillada Farmaajo iyo Lafta Gareen ay kasii socdaan deegaanka, sida uu hadalkiisa u dhigay.

“Horay cosdi ayaan ugu gudbinay Ra’iisul wasaaraha, markaas laguma wareejin masuuliyadaan, laakiin maadaama hadda uu masuul ka yahay doorashada, waxaan ka codsaneynaa inuu dib u heshiisiin ka qabto deegaanadaan, mida kale hadii ficillada Farmaajo iyo Lafta Gareen ay sii socdaan koley dagaal lama huraayo,” ayuu yiri Malaaq Ilyaas.

Hoos ka dhageyso wareysiga

The post Odayaasha Koonfur Galbeed oo SHURUUD adag ku xiray doorasho dhacda + Video appeared first on Caasimada Online.