Galmudug oo Al-Shabab ka furatay hub iyo saanad ciidan

[Deeq A.]

Dhuusamareeb (Caasimada Online) – Dowlad goboleedka Galmudug ayaa shaacisay inay hub ka qabsadeen Al-Shabaab, islamarkaana ay la wareegen goobo ay ku sugnaayeen dagaal-yahanada Al-Shabaab, kadib duqeymihii saaka lala beegsaday.

Duqeymaha ayaa waxa ugu yaraan ku dhintay 60 kamid ah dagaal-yahanada Al-Shabaab, halka kuwo kalena ay ku firxadeen baadiyaha ku dhow deegaanadaas, sida ay sheegen Saraakiisha ciidamada.

Ciidamada huwanta ah ayaa howl-galo culus ka wada goobaha la duqeeyay, oo qeyb ka ah kuwa deegaanada maamulka Galmudug looga sifeynayo kooxda Al-Shabaab oo muddooyinkii dambe si weyn iskugu soo aruursaneysay.

Wasaaradda Amniga Galmudug ayaa sidoo kale kal hore xaqiijisay in laba Gantaal oo laga riday diyaarad lagu duqeeyey saldhig ay Al-Shabaab ku leeyihiin inta u dhaxeysa Qeybcad iyo Hareeri dheere oo dhaca Gobolka Mudug.

“Laba gantaal oo kuwa diyaaradaha laga soo rido ah ayaa lagu duqeeyey saldhig kale oo kooxda Alshabaab ay ku lahaayeen Qaycad iyo Hareeri dheere dhexdooda, waxaana hadda horey u galay ciidamada qaranka iyo kuwa Galmudug,” ayaa lagu yiri qoraal lagu soo daabacay barta Facebook ee Wasaaradda Amniga Galmudug.

Dhawaan ayey aheyd markii duqeyn diyaarado laga fuliyey Degmada Qeycad taasoo sababtay in maleeshiyadii Al-Shabaab ee halkaas ku sugnaa ay isaga baxaan iyadoo hadda ay ku sugan yihiin ciidamada Dowladda iyo kuwa Galmudug.

The post Galmudug oo Al-Shabab ka furatay hub iyo saanad ciidan appeared first on Caasimada Online.