Burcad dhibaato xooggan ku haysay Soomaalida xaafadda ISLII oo toogasho lagu dilay

[Deeq A.]

Nairobi (Caasimada Online) – Ciidamada dharcadka ee Kenya ayaa shalay toogasho ku dilay laba ka mid ah koox burcad ah oo dhac u gaysaneysay bakhaar ku yaala xaafadda Islii ee Magaalada Nairobi.

Ciidamada ayaa sidoo kale dhaawacay afar qof oo kale, kuwaa oo sida la sheegay ka tirsanaa kooxdaasi burcadda ah, waxaana wararka ay sheegayaa in xaaladda qaar ka mid ah ku wa dhaawaca ah ay liidato

Hay’adda Dembi Baarista ee CID-da Kenya ayaa sheegtay in ciidamada amniga ay ka hortaggeen fal burcadnimo ah oo laga gaysanayay xaafadda Islii, oo ay Soomaalida degto, ayna u suurta-gashay inay toogasho ku dilaan laba ka mida demiile-yaashii falkaasi ku lugta lahaa.

Dowladda Kenya ayaa toddobaadyadii la soo dhaafay adkeysay amniga xaafadda Islii, ka dib markii ay ku soo bateen kooxaha burcadda ee dafa teleefanada gacanta iyo sidoo kale falalka afduubta la xiriira.

Xaafadda Islii ee Soomaalida ayaa waxaa aad u beegsada burcadda Kenya, waxaana marar badan ka dhacay boob hanti iyo afduub loo geystay Soomaalida qaarkood oo kadib laga dalbaday lacag madax-furasho ah.

Sidoo kale, ciidamada booliska Kenya ayaa lacag baad ah ka qaata Soomaalida, ayaga oo ugu hanjaba inay xirayaan, taasi oo keentay in inta badan kuwa aan sharciga haysan aysan habeenkii socon.

The post Burcad dhibaato xooggan ku haysay Soomaalida xaafadda ISLII oo toogasho lagu dilay appeared first on Caasimada Online.