Waxgaradka Kismaayo oo cabasho u gudbiyay Madaxweynaha Puntland

[Deeq A.]

Waxgaradka Beesha Harti ee Kismaayo ayaa madaxweynaha Puntland Siciid Cabdullaahi Deni u gudbiyay cabasho ay ka qabaan madaxweynaha Jubaland Axmed Madoobe, sida ay ogaatay Puntland Post.

Waxgaradka oo kulan la yeeshay Madaxweynaha Puntland sabtidii shalay ayaa u gudbiyay cabasho ah in Madaxweyne Axmed Madoobe iyo dadka ku dhowdhow si gaar ah u bartilmaameedsadaan Beesha Hartiga , iyadoo la isticmaalayo awooda dowladda.

Waxay sheegeen in si gaar ah loo beegso hantidooda hadday tahay guri, beer ama meherad kale, falalkaasna ay marar badan sababeen dhimasho iyo dhaawac soo gaaray dad rayida.

Eedaha noocaan ah ee dadka deegaanka u jeedinayaan madaxweynaha Jubbaland oo ah kuwo soo noqnoqda ayey ku sheegeen in aysan jirin cid wax ka qabanaysa isla markaasna ay marar badan madaxweyne Axmed Madoobe arrimahaas ugu tageen laakiin aysan jirin wax is bedelay.

Madaxweynaha Puntland ayaa waxgaradka u sheegay in uu cabashadoda kala hadli doono madaxweynaha Jubaland, uuna rajaynayo in xal laga gaaro arrimahaas.

Dhanka kale Madaxweyne Deni oo maalmihii la soo dhaafay ku sugnaa Kismaayo ayaa galabta u duulay magaalada Nairobi ee dalka Kenya.

PUNTLAND POST

The post Waxgaradka Kismaayo oo cabasho u gudbiyay Madaxweynaha Puntland appeared first on Puntland Post.