Sababta Shabaab ku kaliftay xeeladda cusub ee qaraxyada Muqdisho ay u adeegsato

[Deeq A.]

Muqdisho (Caasimada Online) – Kooxda Al-Shabaab ayaa bilihii ugu dembeeyay beddeshay xeeladda ay u adeegsato qaraxyada ka dhaca Soomaaliya, gaar ahaa Muqdisho, waxayne u weecdeen qaraxyada is-miidaaminta ah oo ay fulinayaan dad isku soo xira waxyaabaha qarxa, kuwaas oo lala beegsanayay bartilmaameedyo kala duwan.

Qaraxyadaas ayaa inta badan waxay sababaan dhimashada dad badan, halka kuwa kalana ay ku dhaawacmaan, waxayna meesha ka saareen qaraxyadii inta badan lagu yaqaanay argagixisada ee gawaarida iyo miinooyinka.

Haddaba, maxay tahay sababta ay u soo badanayaan qaraxyada is-miidaminta ee dadka isku soo xiraya waxyaabaha qarxa?

Khabiir amni Xuseen Macallin Maxamuud oo ah maamulaha machadka daraaseeya amniga ee Hiraal ee fadhigiisu yahay Muqdisho oo la hadlay idaacada VOA-da ayaa sheegay in xeelada is-miidaaminta dadka is-qarxinaya ay usoo badaneyso waxyeeladeeda oo sareysay iyo sida fudud ee ugu gudbi karaan bartilmaameedkooda.

Xuseen ayaa asagu qaba in argagixisada ay ku guul-dareysteen in gawaari qaraxyo ka buuxan ay soo galiyaan gudaha magaalada Muqdisho, islamarkaana ay u wareegsadeen xeelada is-miidaaminta dadka.

“Tabaha ay kusoo weerar tagaan waa midka baabuurta iyo ciidamada isla socda waana midka ay jeclaan lahaayeen inay fuliyaan, midka badalka ah ee ugu muhiimsan waa qofka is-qarxinaya maadama uu halkii mar leyn karo tiro dad ah,” ayuu yiri.

Kooxda Al-Shabaab oo ayadu inta badan qaraxyada ka fulisa magaalada Muqdisho, ayaa xiligaan si weyn u adeegsata qaraxyada is-miidaaminta ee qofku isku soo xiro, kadib markii ay ku guul-dareysteen inay gudaha u soo galiyaan magaalada gawaari ay ka buuxan walxaha qarxa.

https://www.caasimada.net/wp-content/uploads/2021/07/1bb6ccb9-dd2f-48bc-a45f-421f001d8285_48k.mp3

The post Sababta Shabaab ku kaliftay xeeladda cusub ee qaraxyada Muqdisho ay u adeegsato appeared first on Caasimada Online.