Walaalo Muddo 30 sano ah u xidhnaa dembi aysan gelin oo helay lacag lama filaan ah

[Deeq A.]

 Walaalo Muddo 30 sano ah u xidhnaa dembi aysan gelin oo helay lacag lama filaan ah

Henry McCollum

Heshiis taariikhi ah oo 75 milyan oo doollar lagu guddoonsiiyay laba nin oo walaalo ah oo ku nool dalka Maraykanka oo in ka badan soddon sano u xirnaa dembi aysan galin ayaa dib u soo cusboonaysiiyay xukunkii khaldanaa ee lagu riday labadan nin ee walaalaha.

Henry McCollum iyo walaalkiis oo ay isku aabbo yihiin Leon Brown, ayaa laba jeer lagu xukumay dembi la xiriira kufsi iyo dil loo geystay gabar 11 jir ah sanadkii 1983.

Sanadkii 2014, waxaa la helay caddaymo cusub oo la xiriira hidde-sidaha dhiiga ee DNA, taas oo horseeday in cafis buuxa loo fidiyo labada nin isla sanadkii xigay.

Jimcihii ayaa loo xukumay magdhow gaaraya 31 milyan oo doollar in la siiyo mid walba. Lacagtaas ayaa u dhiganta 1 milyan oo doollar sanad walba oo ay xabsiga ku qaateen. Waxaa kale oo loo xumay 13 milyan oo doollar oo dheeraad ah.

“Waxaa mahadsan Alle,” ayuu yiri McCollum, isaga oo ilmaynaya, markii uu ka soo baxayay qolka maxkamadda isaga iyo walaalkiis, ku dhowaad toddobo sano ka dib markii uu garsooraha xukumy in la sii daayo.

“Weli dad badan oo aan waxba galabsan ayaa ku jira xabsiga maanta,” ayuu yiri McCollum. “Mana u qalmaan inay halkaas sii joogaan.”

 

Qaabka uu u dhacay kiiskan?

24-kii Sebtember 1983, booliiska gobolka North Carolina ayaa meydka gabar 11 jir ah ka dhex helay beer halkaas ku taala.

Maalintii xigtay, iyagoo aan helin cadaymo ku filan ayaa waxay xireen McCollum iyo Brown, oo ahaa laba dhalinyaro Afrikaan Mareykan ah oo da’doodu ahayd 19 iyo 15 jir.

Kaddib su’aallo qaatay muddo saacado ah oo la weydiinayay labada wiil xilligaas oo uusan goob-joog ahayn qareenkooda ayaa lagu qasbay inay saxiixaan warqado horay loo qoray oo midba midka kale ku tuhmayo dambiga.

Dukumiintiyada maxkamadda ayaa caddeeyay in labada walaalo ay ku adag yihiin dhanka garashada oo ay si dhib ah wax ku akhrin karaan, u qori karaan ama u fahmi karaan waxa ay saxiixayaan.

Labadaba waxaa lagu xukumay dil. Brown wuxuu noqday maxbuuskii ugu da’da yaraa ee dil lagu xukumo, laakiin markii dambe waxaa lagu xukumay xabsi daa’in. McCollum wuxuu noqday maxbuuskii ugu waqtiga dheeraa ee gobolka ee xukun dil ahna lagu xukumo.

Sannadkii 2014, natiijooyinka baaritaanka DNA ayaa shaaca ka qaaday dembiilaha saxda ah inuu yahay Roscoe Artis.

Immisa xukun ayaa si khaldan uga dhaca Mareykanka?

Waxaa ilaa hataan la diiwaan galiyay 2,784 qof oo dembi lagu waayay tan iyo markii uu diwaanka qaranka billaabay ururinta xogaha.

In ka badan kalabar dhammaan kiisaskan waxay ku lug leeyihiin nooc ka mid ah dacwad oogista ama dhaqan-xumada laamaha ammaanka. Ku dhowaad 50% eedeysanayaasha la xukumay oo markii dambe la ogaaday in aysan wax dembi ah lahayn ayaa madow ah.

Xogta ayaa sidoo kale lagu ogaaday in dadka madow ay todobo laab u badan tahay in si khalad ah dil loogu xukumo marka loo eego dadka cadaanka ah.

Magdhowga badan miyay helaan?

Dadka u dhashay Maraykanka ee sida khaldan loo xukumay waxay gudbisan karaan dacwad, iyagoo ku doodaya in xuquuqdooda lagu xadgudbay balse mararka qaar wax natiija ah oo wanaagsan ma helaan.

Waxaa mararka qaar adag in lala xisaabtamo saraakiisha ammaanka, maadaama uu si weyn u ilaaliyo sharciga Maraykanka ee hada jira.

Balse cadaadiska ah in booliska iyo saraakiisha kale lagula xisaabtamo mas’uuliyadda dembiyadooda ayaa sii kordheysa, iyadoo dhawaanahan ay socdeen dhaqdhaqaaqyo caddaalad loogu raadinayo dadka madow.

Xukunkii Jimcaha ee North Carolina ayaa yimid kadib markii labo hay’ad oo ku lug leh arrinta ay horey ula heshiiyeen walaalaha.

Qaran News