NORWAY Oo Ka Laabatay Qoraalkii Ay Ku Dalbatay Inay Deg-deg Xil Wareejiso Dawladda Soomaaliya, Soona Saartay Mid Cusub

[Deeq A.]

(SLT-Oslo)-Dowladda Norway ayaa saacado kadib dib uga laabatay qoraalkii ugu adkaa ee ay kasoo saarto khilaafka doorashada Soomaaliya, kaasi oo ay si cad uga dalbatay Villa Somalia inay xukunka deg-deg u wareejiso.

Qoraalka cusub ee kasoo baxay safaaradda Norway ee Muqdisho oo lasoo dhigay twitter-ka, ayaa waxaa lagu sheegay in dowladda Norway ay dhex-dhexaad ka tahay dhaq-dhaqaaqyada gudaha, islamarkaana ay rabto doorasho deg-deg ah, halka markii hore ay dalbatay ‘in Villa Somalia ay xukunka deg-deg u wareejiso’.

“Safaaradda waxa ay jeceshahay inaan caddeyno in waxa aan rajeyneyno inaan aragno ay tahay doorashooyin deg-deg ah oo nabdoon oo ku dhisan heshiis. Norway, oo ah saaxiib iyo jaal muddo dheer oo Soomaaliya ay leedahay, dhex-dhexaad ayey ka tahay kana ahaan doontaa ikhtiyaarada gudaha ee ay sameeyaan shacabka Soomaaliya,” ayaa lagu yidhi qoraalka Norway.

Qoraalkii hore ee Norway “Saaxiib dhow ahaan, Norway waxay is qoto dheer uga walaacsan tahay rabitaan la’aanta siyaasadeed ee dhammaan dhinacyada ee ah inay xal raadiyaan. Dowladda Soomaaliya waxaa waajib ku ah inay xaqiijiso xukun wareejin deg deg ah, sidoo kale dhammaan jilayaasha siyaasadeed.”

Qoraalkaas ayaa ah kii ugu adkaa ee mid kamid ah dalalka beesha caalamka uu kula hadlo dowladda Soomaaliya, hase yeeshe ay dib u dabcisay mowqifkeedii adkaa ee muujisay.

Inta badan dalalka reer galbeedka ee saxiibada la ah dalka Soomaaliya ayaa waxaa lagu eedeya in ayna runta u sheegi karin madaxweynaha muddo xileedkiisu dhammaaday ee Farmaajo, kuwaasi oo dhowr jeer Midowga Musharaxiinta u direen baaqyo la xidhiidha xaalada Soomaaliya.

Norway oo kamid ah dalalka lacagta ugu badan ku bixiya Soomaaliya ayaa markii u horreysay luuqad adag kula hadashay madaxda waqtigooda dhammaaday, inkasta oo ay markii dambe dabacsanaan ka muujisay xaalada dalka Soomaaliya.

Musharaxiinta mucaaradka ayaa hore u sheegay in sababta xal looga gaadhi la’yahay khilaafka doorashada ay tahay ayada oo la la’yahay cid runta u sheegta FARMAAJO, xilli ay sheegeen inay caddahay in aanu doorasho rabin, oo uu doonayo inuu xukunka sii haysto

Source