“Shahaado Jaamacaddeed Waa La Iska Samaysan Karaa, Markaa Waxaanu Ku Xidhaynaa Si Aanu U Hubino Sooyaalkiisii Waxbarasho, Shahaadadii Dugsiga Sare Iyo Ta Jaamacadda Inuu Qofka Murrashax Ahi Noo Wada Keeno…” Guddoomiyaha Tacliinta sare

[Deeq A.]

Guddoomiyaha Komishanka Tacliinta sare ee Somaliland Saleebaan Dirir Cabdi, ayaa sheegay in ay maalinta berri oo salaaso ah, kuna beegan 23 Feb, ay bilaabayaa qabashada shahaadooyinka laga doonayo murrashaxiinta Goleyaasha Deegaanka ee darajadoodu tahay A, oo ah Shahaado heerka koowaad ee Jaamacadda ah.

Guddoomiye Saleebaan Dirir, waxa uu xusay in ay shaqada hubinta iyo qabashada shahaadooyinka xeerka doorashooyinka 91/2020 ku waajibiyey murrashaxiinta Goleyaasha Deegaanka ee 7 Degmo ee A ah, ay iyagu Komishan ahaan loo geyn doono shahaadooyinka iyo soyaalka waxbarasho ee Murrashaxiintaasi.

Guddoomiyaha Tacliinta sare, waxa uu ku war geliyey Murrashaxiinta goleyaasha Deegaanka ee Degmooyinka A ah, in shahaadada Jaamacadda ee heerka koowaad iyo weliba Shahaadadii Dugsiga sare ay soo qaataan, isla markaana yimaadaan Xafiiskooda Hargeysa oo u dhow Xarunta Akadamiyadda ee Magaalada Hargeysa.

Guddoomiye Saleebaan Dirir, waxa uu sheegay in ay aad u hubinayaan Shahaadooyinka, isaga oo xusay in wakhtigan si fudud loo samaysan karo shahaado Jaamacaddeed, si ay taasi uga gaashaantaana ay Shahaadada Dugsiga sare iyo sooyaalkii waxbarasho ee qofka murrashaxa ah la hubin doono.

Source