Xildhibaan Maxamed Cali oo hub la galay baarlamaanka Kenya

[Deeq A.]

Xildhibaan Maxamed Cali oo hub la galay baarlamaanka Kenya

Waxaa maalintii Khamiista ahayd baarlamaanka dalka Kenya ka dhashay cabsi weyn kaddib markii gudaha baarlamaanka lagu arkay xildhibaan hubaysan.

Xildhibaan Elisha Odhiambo ayaa ku wargaliyay afhayeenka baarlamaanka in uu arkay wax u eg hub kuna jira jaakada xildhibaan Maxamed Cali oo ah xildhibaan laga soo doorto degmada Nyali ee magaalo xeebeedka Mombasa.

Afhayeenka baarlamaanka, Justin Muturi, ayaa Mr Cali ka codsaday inuu xaqiijiyo inuu hub wato iyo inkale.

“Iga raali ahaada, waan hilmaamay inaan hubkeyga banaanka uga soo tago, waxaan ahay bini’aadam,” ayuu yiri Mr Ali.

“Mudane Guddoomiye, ii oggolow inaan is dhiibo,” ayuu yidhi Mr Cali kaddib markii qaybta warbaahinta ee baarlamaanka ay kaamarooyinka ka fogeysay xildhibaanka.

Waxaa isla markiiba Mr Cali la waydiiyey inuu hubkiisa geeyo banaanka qaybta keydka hubka, sida uu sharcigu qabo.

 

 

Afayeenka ayaa ku booriyay sarkaalkiisha ammaanka inay feejignaadan oo ay dhaqangaliyaan shuruucda isaga oo arrinkan ku tilmaamtay “kormeer xun”.

Mudane Cali wuxuu ku dhaleeceeyay xildhibaan Odhiambo inuu arrintan si khaldan u faafiyay, wuxuuna sheegay inay tahay mid siyaasadeysan, maadaama ay labaduba taageerayaan dhinacyo kala duwan.

Xildhibaanad kale oo lagu magacaabo Millie Odhiambo ayaa sheegtay in wadanku siyaasad ahaan isbadal badan ka jiro, waxayna ku talisay in la qaado tallaabooyin badan oo dhanka amaanka ah.

Sharci-dajiyayaasha Kenya waxay ku kala qaybsan yihiin baaqyada socda ee ku saabsan wax ka beddelka dastuurka ee la soo jeediyay.

Madaxweynaha iyo ku xigeenkiisa ayaa sidoo kale ku kala jira dhinacyo kala duwan, marka ay timaado mowqifka aftida lagu raadinayo.

Qaran News