Wararkii Ugu Dambeeyay Qaraxyo Ka Dhacay Magaalada Muqdisho, Al-Shabaab Oo Ka Hadlay

[Deeq A.]

(SLT-Muqdisho)-Warar kala duwan ayaa lag helayaa Qarax goor dhaweyd ka dhacay Magaalada Muqdisho, gaar ahan waddada aadda Garoonka Diyaaradaha ee Aaddan Cadde, waxaana Qaraxu uu si gaar ah uga dhacay Iridda hore ee Hoteel Afrik.

Dagaalamayaasha Al-Shabaab ayaa sheegtay Qaraxyo iyo weerar toos ah oo caawa ka socda Hoteelka Afrik ee Magaalada Muqdisho.

War Al-shabaab ay ku qoreen barahooda Internet-ka ayay ku sheegteen mas’uuliyadda Qarax dhacay iyo dagaalka socda, waxaana ay sheegeen in wali is-rasaaseyn xooggan ay ka wadaan gudaha Hoteelka, iyagoo intaas ay ku daray in mas’uuliyiin katirsan Dowladda ay ku sugnaayeen Hoteelka la bartilmaameedsaday.

Wali waxaa socda dagaal xooggan oo u dhexeeya Ciidanka Dowladda iyo dableydii weerarka soo qaadday, waxaana wararkii ugu dambeeyay ay sheegayayaan in wali howlgal uu ka socdo gudaha hoteelka.

Qaraxa waxaa ka dhashay dhimasho iyo dhaawac, waxaana ilaa hadda aan la xaqiijin khasaaraha rasmiga ah ee ka dhashay weerarkaasi qaraxyada ku billawday, waxaan goobta soo buux dhaafiyay Ciidan badan oo Dowladda ka tirsan, iya oo sidoo kale ay goobta ku sugan yihiin Ciidanka sida gaarka ah u tababarane ee Haramcad.

Source