Puntland oo eedeyn u jeedisay Xiriirka Kubbadda Cagta Soomaaliya

[Deeq A.]

Tigaana (bidix) iyo Xasan Barre

Mas’uuliyiin ka tirsan Pumtland oo ka hadlay ciyaartii galabta ee Galmudug iyo Puntland ayaa Xiriirka Kubbadda Cagta Soomaaliya ku eedeeyay eexasho.

Agaaasimaha Wasaaradda Dhalinyarada iyo Ciyaaraha Puntland Cabdalla Tigaana iyo Xasan Bare oo ka tirsan Xiriirka Kubbadda Cagta Puntland ayaa sheegay in ciyaarta ay ka jirtay garsoor xumo.

Waxay Xasan Kaafi oo ahaa dhexdhexaadiyihii ciyaarta ku eedeeyeen in uu iska indho tiray gool dhashay iyo khalad kale oo laga galay xulka Puntland, waxayna tilmaameen in ay la tiigsan doonaan maxkamad.

Sidoo kale waxay sheegeen in ciyaartoyda Puntland lagu handaday garoonka dhexdiisa, waxayna Xiriirka Kubbadda Cagta Soomaaliya ku eedeeyay in uu kutalagal u reebay Puntland.

Xulka Puntland ayaa galabta ka haray tartanka dowlad goboleedyada iyo gobolka Banaadir, markii wareega rubuc dhammaad uu 2-1 ugu awood sheegtay xulka Galmudug.

Galmudug oo u baxday kamadambaysta (final) ayaa sugaysa midkood xulalka Koonfur Galbeed iyo Banaadir oo berri wada ciyaaari doona.

Xulka Puntland oo labo jeer tegay kamadambaysta tartankan (2016-2017) ayaa sanadkan Muqdisho la tegin ciyaarihii lagu yaqaanay.

PUNTLAND POST

The post Puntland oo eedeyn u jeedisay Xiriirka Kubbadda Cagta Soomaaliya appeared first on Puntland Post.