Muqdisho: Maxkamadda Ciidamada Qalabka Sida oo Xukun Ku Riday Rag Lala Xiriiriyey Al-shabab

[Deeq A.]

Xasan Cabdi Aadan Nuur & Cumar Xuseen Abshir Jaabir  ayaa loo haystaa ka mid ahaanshiyaha Alshabaab gaar ahaan in ay ahaayeen Hoggaamiye  iyo Darawalkiisa si gaar ah uga shaqeyn jiray deegnnada xiriirsan  degmada  Balcad & deegaanka Basro ee gobolka Shabeellaha dhexe.

Weerar ay ku qaadeen fariisin ay ciidamada xoogga dalka ku lahaayeen cirifyka ay degmada Deyniile ee gobolka Banaadir kala wadaagto Basro ee gobolka Shabeellaha  dhexe ayaa labada Eedeysane lagu soo qabtay iyaga  oo dhawaac ah bishii November sanadkii tegay 2019-ka.

Hey’adaha Caafimaadka Dowladda ayaa isku howlay sidii ay u baxnaani lahaayeen Maadaama dhaawacyo ay gaareen, waxaana 11-kii March Sanadkan ay ku wareejiyeen xafiiska Xeer Ilaalinta oo xilligaas codsaday in xabsiga dhexe loo taxaabo Xasan iyo Cumar, si’ay u soo dhameystiraan eedaha labada eedeysane Baaristooda.

Xasan Cabdi Aadan Nuur ayaa ahaa madixii Maaliyadda degmada Balcad u qaabilsanaa  Alshaaab laakiin waxa uu ku qiray qiraalkiisa in ay caawinayeen koox iyaga ku tirsan oo uu weerarka ku qabsaday Doonka.

Cumar oo isaga wada Mooto u ahaa Xasan ayaa isna Maxkamadda ka hor sheegay in uu ahaa nin iskiis isaga xamaasho laakiin xafiiska Xeer Ilaalinta ciidamada qalabka sida ayaa labada shaqsi kuwada Eedeeyay in ay qayb ka ahaayeen weerar ay Alshabaab ku qaadeen fariisin ciidan bishii November ee Sanadkii tegay,

Muumin Xuseen Cabdullaahi ku xigeenka Xeer Ilaaliyaha guud ee ciidamada qalab sida ayaa Maxkamadda u sheegay in ay labada Eedeysane wada ahaayeen gurmad laakiin ciidamada ay u geysteen dhaawac naafeen ah.

Qareennada u dooday labada Eedeysane ayaa iyagana Maxkamadda ka codsaday in loo naxariisto maadaama labada eedeysane ay  u aheyd howlgalkii ugu horreeyay ee dagaal oo ay kawada qayb galeen isla markaan uu dhaawaca ka soo gaaray labadaba.

Gaashaanle Sare Xasan Cali Nuur Shuute guddoomiyaha Maxkamadda darajada koowaad ee ciidamada qalabka sida oo soo xiray fadhiga Maxkamadda ayaa Xasan Cabdi Aadan Nuur iyo Cumar Xuseen Abshir Jaabir kuwada xukumay xabsi daa’in sida uu u sheegay dhinacyada Dacwadda ,Eedeysanayaasha ayaa heysta Fursad ay ku dalban karaa Rafcaan  muddo ku siman 30 cisho xukunka kadib.

Goobjoog News

Source: goobjoog.com