Muxuu CC Shakuur u doonayaa inaan la qarin khasaaraha gaara ciidamada Soomaaliya?

[Deeq A.]

Muqdisho (Caasimadda Online) – Hogaamiyaha xisbiga Wadajir Cabdiraxmaan Cabdishakuur Warsame ayaa dowladda Soomaaliya ugu baaqay ineysan qarin khasaaraha ciidanka kasoo gaara weerarada argagixiso hadiiba aysan wax ka qaban karin dayaca ay wajahayaan.

Hogaamiyaha wuxuu qoraal aan badneyn kusoo qoray bartiisa twitter-ka isagoo ku bilaabay cambaareyn la xiriirta weerarka shalay ka dhacay magaalada Muqdisho.

Saldhig ku yaalla meel u dhaw garoonka ciyaaraha (Stadium Muqdisho) ayuu weerarka ka dhacay, waxeyna goobtaas aheyd saldhigga qeybta 27-aad ee ciidanka xoogga dalka leeyahiin.

Sida wararka la helay ay sheegayaan 8-askari ayaa ku geeriyootay qaraxa, halka tira kalana ay dhaawacyo kasoo gaareen.

Cabdiraxmaan Cabdishakuur oo tacsi u diray ehelada dadka ku geeriyooday ayaa sidoo kale dowladda baaq u diray.

Qoraalka Siyaasiga Cabdiraxmaan Cabdishakur:

Waxaan canbaareynayaa weerarkii ay maanta kooxda aragagexisada Al-shabaab la beegsadeen saldhigga Qaybta 27-aad ee ciidanka xoogga dalka ku leeyihiin agagaarka Muqdisho Istaadyoom. Waxaan alle uga baryayaa in uu naxariistiisa siiyo ciidankii cadawgu laayeeen, una booga dhayo inta dhaawaca ah. Maalmahaan dayaca ciidanka wuu waynyahay, tabashaduna way badantahay, tuhunkana wuu isi soo tarayaa. Waa in dowladdu xil iska saarto ciidanka. Haddii aan wax la taraynin, ma aha in la qariyo khasaaraha ay argagexisadu u gaysanayso ciidanka.