Horjoogayaashii Al-Shabab ee dhulka xeebaha, Ciise Yare iyo Xeerow oo howlgal lagu dilay

[Deeq A.]

Marka (Caasimada Online) – Ciidamada kumaandooska xoogga dalka ee Danab iyo Gor-Gor oo si wada jir ah u howlgalaya ayaa maanta Al-Shabaab kala wareegay degaanada Jilib-Marko iyo Gendershe oo hoos  taga degmada Marka ee xarunta gobolka Shabeellada Hoose.

Howlgalka oo ahaa mid qorsheysan ayaa saraakiisha hogaamineysa ciidamadaas waxa ay sheegeen in qorshuhu yahay sidii Al-Shabaab looga saari lahaa dhulka xeebta ee u dhaxeeya degaanka Jasiira ee duleedka Muqdisho iyo degmada Marka.

Taliyaha guutada 16-aad ee danab Gaashaanle Ismaaciil Cabdimaalik Maalin ayaa Idaacadda Ciidamadda Qalabaka Sida u sheegay in ciidamadu intii ay howlgalka ku jireen ay ku dileen laba sarkaal oo Al-Shabaab u qaabilsanaa degaanada xeebta dhaca ee maanta ay ciidamadu la wareegeen.

Taliyahaa ayaa sidoo kale sheegay in saraakiisha laga dilay Al-Shabaab lagu kala magacaabo Xeroow iyo Ciise Yare, haatana ay ku raad joogaan sarkaal kale oo lagu magacaabo Shuceyb Fanax, kaas oo kamid ah hoggaamiyaasha sare ee Al-Shabaab u qaabilsan dhulka xeebta ah.

Ciidamadda kumaandooska xoogga dalka ee Danab iyo Gor-Gor ayaa haatan waxay deegaanadii ay la wareegeen ka wadaan howlgallo baaritaano ah oo ay ku xaqijinayaan ammaanka, sida uu sheegay Taliyaha ka warbixiyey howlgalladaas.