Puntland: Dadka dibad-baxyada ka abaabulayo Boosaaso waxay la mid yihiin Shabaab

[Deeq A.]

Boosaaso (Caasimada Online) – Guddoomiyaha maamulka gobolka Bari ee Puntland, Yuusuf Maxamed (Abwaan) oo ka hadlayey xaaladda gobolkaasi ayaa soo hadal qaaday cabashada shacabka ku dhaqan Boosaaso ee ku aadan sida loo qeybiyey afarta waaxood ee ay ka kooban tahay magaaladaasi.

Abwaanka ayaa sheegay in hannaanka lagu qeybiyey waaxahaasi aan lagu saleynin nidaamka Qabiilka, balse lagu qorsheeyey nidaamka dowliga ah ee la xiriira daadajinta adeegyada dadweynaha.

Sidoo kale wuxuu tilmaamay in nidaamkaasi ay soo hindiseen golaha deegaanka ee Boosaaso.

Guddoomiyaha gobolka Bari oo hadalkiisa sii wata ayaa xusay in aysan jirin wax cabasho ah oo ka soo gaaray shacabka, wuxuuna hoosta ka xariiqay inay la fariisan doonaan cid kasta oo tabasha qabta.

Waxa kale oo uu tilmaamay inay gacan bir ah ku qaban doonaan cid alaala oo sameysa fal kasta oo liddi ku ah nabad-gelyada deegaanka.

Ugu dambeyn wuxuu carabka ku dhuftay in dadka mudaharaadyada ka abaabulaya magaalada Boosaaso ay la mid yihiin Al-Shabaab, islamarkaana ay ka qaadi doonaan tallaabo adag oo sharciga waafaqsan.