Hay’adda WHO Oo Soo Dhawaysay Natiijada Dawo Dili Karta Covid-19 Oo La Helay

[Deeq A.]

(SLT-London)-Hay’adda caafimaadka adduunka ayaa soo dhawaysay natiijada tijaabooyinka hor dhaca ah ee dawada dexamethasone.

Bukaanada laga quustay ee ku neefsanaya qalabka loo yaqaanno ventilators-ka ayaa la sheegay inay dhimashadooda hoos u dhacday, sidoo kale bukaanada u baahnaa Oxygen-ka ayaa tiradooda hoos u dhacday kaddib markii dawadan lagu tijaabiyay.

Cilmi-baadheyaasha ayaa sheegay in haddii dawadan la isticmaali lahaa markii ugu horreysay ee uu fayraska gaadhay UK ay badbaadin kari lahayd nolosha dad gaaraya 5,000 oo hadda geeriyooday.

Dalalka saboolka ah ee dunida, oo cudurka Covid-19 uu aad u saameeyay ayey faa’iidada ugu weyn u noqon doontaa, maadaama uu kharashkeedu aad u yaryahay.

Qiyaastii 19 ka mid ah 20-kii bukaan ee uu ku dhaco fayraska corona waxay ka caafimaadaan iyagoo aan cisbitaal la dhigin.

Xitaa kuwa isbitaalka la dhigo badankood way kasoo kabsadaan cudurka, balse qaarkood ayaa laga yaabaa inay u baahdaan in lagu xiro qalab neefsashada ka caawiya.

Kuwaas ayaa ah bukaannada halista weyn ugu jira inay u geeriyoodaan cudurka.

Waxaase la aaminsan yahay inay si fiican u caawin karto dawada dexamethasone.

Source