Xog sirdoon oo sheegtay in baabuur qaraxyo lagu xiray ay ku jiraan magaalada…

[Deeq A.]

Beledweyne (Caasimadda Online) – Guddoomiye ku-xigeenka Amniga Maamulka Gobolka Hiiraan Maxamed Meyris Isaaq Cabdulle ayaa shaaciyey in gawaari lagu soo xiray waxyaabaha qarxo lasoo geliyey gudaha Magaalada Beledweyne ee Xarunta Gobolka Hiiraan.

Guddoomiyaha ayaa sheegay inay Magaalada ka wadaan howlgalo lagu baadi-goobayo gawaaridaas oo laga sameenayo xaafadaha kala duwan ee Beledweyne.

Wuxuu tilmaamay inay heleen xogo sirdoon oo la isku haleyn karo oo sheegaya in kooxda Al-Shabaab ay magaalada Beledweyne soo geliyeen baabuur lagu soo xiray waxyaabaha qarxo, sidaasna heegan buuxa lagu geliyey ciidamada Ammaanka.

Guddoomiyaha ayaa xusay inay saxaafadda lasoo wadaagi doonaan waxyaabaha kasoo baxo baaritaanada ka socdo gudaha Magaalada maadaama uu sheegay in mas’uuliyadda amniga Hiiraan ay iyaga saaran tahay.

Guddoomiye ku-xigeenka ma uusan sheegin tirada gawaarida qaraxyada sida ee lasoo geliyey Magaalada Beledweyne, meelaha lala bartilmaameydsan doono iyo waqtiga lasoo geliyey.

Ugu dambeyntii guddoomiye ku xigeenka ayaa sheegay inay maanta joojiyeen banaanbax lagu taageeri lahaa Dowladda Soomaaliya oo la filayey in lagu qabto Magaalada Beledweyne, wuxuuna sababta loo joojiyey ku sheegay inaan lagu soo wargelin.