Madaxweyne Biixi Oo Saleebaan Ka Diiday In La Fasaxo Flaydubai Iyo Air Arabia (Maxaa Loo Curyaaminayaa FLY DUBIA Iyo Air Arabia??)

[Deeq A.]

(SLT-Hargeysa)-Madaxweyne Biixi, ayaa diiday ergo uu hoggaaminayay guddoomiyaha golaha Guurtida Somaliland oo madaxweynaha ugu tegay sidii uu shaqadooda ugu fasaxi lahaa labadan shirkadood oo hore xukuumaddu u joojisay in ay ka hawlgalaan Garoomada Somaliland

Madaxweyne Biixi, ayaa Ergadan u sheegay in aan labadan shirkadood waddanka ku joogin Sharci balse sarkaal ka tirsan hay’adda Duulista ayaa sheegay in shirkadahani waddanka ku joogaan sharci kuwaas oo la mid ah sharciga ay waddanka ku joogaan Ethiopian Airline iyo Air Jabuuti.

Labadan Diyaaradood ayaa hore Duullimaadyadooda u joojiyay kadib markii Dawladda Imaraadka Carabtu joojisay dhammaan Duullimaadyada Caalamiga ah ee waddankaasi balse hadda waxa soo baxaya warar sheegaya in madaxweyne Biixi, doonayo in shirkadahan uu lugta u qabto shirkadda Ethiopian Airline oo tartan weyni kala dhexeeyo FLY DUBIA iyo Air Arabia.

shirkadda Ethiopian Airline oo uu wakiil ka yahay Wiil uu abti Ruma u yahay madaxweyne Biixi, oo lagu magacaabo Cabdiqafaar, ayaa doonaysa in ay si fiican uga faa’idaysato suuqa Duullimaayada oo Kooto uu madaxweyne Biixi ugu xidho sida Ilo xogogaal ah xaqiijiyeen.

Labadan Diyaaradood ayaa hore u diiday dalab uga yimi Dawladda Soomaliya oo ahaa in ay Muqdisho ka hawl-galaan halka Ethiopian Airline aqbashay oo ay hadda ka hawlgasho.

FLY DUBIA iyo Air Arabia ayaa door muhiim ah ka qaatay kobaha Dhaqaalaha Somaliland sidoo kalena haddii madaxweyne Biixi, ku adkaysto go’aankiisa waxa suuragal ah in ay si weyn u dhaawacdo Cilaqaadka Somaliland iyo Imaraadka Carabta iyo weliba mashaariicda waa weyn ee Imaraadku ka wado Somaliland sida Berbera Corridor iyo DP World oo maalgelinaysa dekedda Berbera.

Labadan shirkadood ayaa waxa iska leh Dawladda Imaraadka Carabtab waxana ay u muuqataa in madaxweyne Biixi, cilaaqaadka Imaraadka Carabta ka doorbidayo Lacag gaar ah ee ka soo gasha Diyaaradda uu wakiilka ka yahay wiilka uu Abtiga u yahay ee Ethiopian Airline.

Labadan shirkadood ayaa Somaliland waxa uga hawlgalayay shaqaale badan kuwaas oo weli u xanniban amarka madaxwyne Biixi.

Sidoo kale waxa labadan shirkadood la shaqaynayay ilaa 40 shirkadood oo waddaniya kuwaas ah kuwa Tigidhada jara oo iyana weli xidhan maadaama oo ay ku tiirsanaayeen Duullimaadyada FLY DUBIA iyo Air Arabia.

Source