Faah faahino ka soo baxaya qarax ciidamo lagula eegtay G/ Baay

[Deeq A.]

Warar dheeraad ah ayaa ka soo baxaya qarax maanta ciidamo ka tirsan kuwa Itoobiya lagula eegtay wadada xiriisa degmooyinka Bardaale iyo Qansaxdheere ee gobolka Bay.

Kolonyo ay la socdeen ciidamada Itoobiya ayaa qarax miino lala bartilmaameedsaday, waxaana xigay dagaal toos ah oo dhexmaray ciidamadaas iyo Al-Shabaab.

Dad ku sugan degmada Qansaxdheere ayaa Idaacada Shabelle ee magaalada Muqdisho waxa ay u sheegeen in uu jiro khasaare dhimasho iyo dhaawac ah oo qaraxaasi ka soo gaaray ciidamada dowladda Itoobiya, balse aan la xaqiijin karin inta uu la egyahay.

Sidoo kale wararka ayaa intaasi ku daraya in ciidamadu ay sii wateen socdaalkooda, islamarkaana ay gaareen gudaha degmada Qansaxdheere oo ay ku sii jeedeen.

Wararkii u dambeeyay ee naga soo gaaraya gobolka Baay ayaa waxa ay sheegayaan in jawiga uu haatan yahay mid degan, islamarkaana isku socodka dadka iyo gaadiidkau u  sidii hore ku soo laabtay, kadib markii ay hakad galeen xilliga uu qaraxu dhacay.

View the full article