Xog: Beesha Habar-gidir oo gaari aysan xabada karin u iibisay Janaraal Cali Gaab

[Deeq A.]

Muqdisho (Caasimada Online) – Ilo wareedyo lagu kalsoon yahay ayaa u sheegay Caasimada Online in wakiilo ka socday beesha Habar-gidir ay gaari aan xabada iyo qaraxyadu karin ku wareejiyeen Janaraal Cali Xirsi Barre Cali Gaab, oo laba jeer ka badbaaday qaraxyo lala beegsaday.

Gaariga ayaa la sheegay in uusan aheyn hanti dowladeed balse ay si shaqsi ah ugu soo iibiyeen ehelkiisa, si ay ugu dadaalaan bad qabkiisa maadaama uu halis ugu jiro weeraro ku socda.

Sidoo kale wararka aan helnay ayaa sheegaya in isbadal lagu sameyn doono ilaalada Cali Gaab maadaama inta ugu badan ay dhaawacyo qabaan. Si rasmi ah looma oga cida beegsaneysa Cali Gaab laakiin waxaa la aaminsan yahay in aysan aheyn Al-Shabaab oo kaliya.

Wax ka yar toban maalmood gudahood ayaa laba jeer Cali Gaab uu ka bad-baaday qarayxo lagu dili lahaa, waxaana jira shaki ku saabsan in dad isaga ku dhow oo wax ka og dhaq-dhaqaaqiisa ay bixinayaan xogtiisa.

Genaraal Cali Xirsi Barre Cali Gaab, waxa uu ku jiraa saraakiisha fara ku tiriska ah ee ka haray ciidamadii hore ee Soomaaliya, sidoo kale waa nin shaqo oo qeybo badan oo booliska Soomaaliya ah ka soo shaqeeyay.

Xubno kamid ah ehalada Cali Gaab ayaa noo sheegay in gaari Baruuf ah looga dalbay dowladda balse ay noqotay mid aan mira dhalin taasina ay sababtay in beeshiisa ay si deg deg ah ugu soo iibiyaan gaari aan xabadda karin.