DF oo dalka dib ugu soo celineyso Soomaalida qaar ee ku sugan dalka Kenya

[Deeq A.]

Safaaradda Soomaaliya ee dalka Kenya ayaa shaaca ka qaaday in dadka Soomaaliyeed ee ku xayiran magaalada Nairobi ee is-diiwaangeliyay dalka dib loogu celinayo, islamarkaana ay shirkadda Daallo Airline u jari doonto Tikityadii ay ku laaban lahaayeen.

War ka soo baxay Safaaradda Soomaaliya ee Nairobi ayaa waxaa lagu sheegay in shirkadda Daallo Airline ay la xiriiri doonto dhammaan dadkii is-diiwaangeliyay ee heysta baasaboorka Soomaaliya ama degenaanshaha Kenya.

Safaaradda ayaa sheegtay in qof kasta oo safraya inuu iska baara cudurka Covid-19, isla markaana dadka laga waayo cudurkaas la qaadi doono.

“Qof kasta oo safraya waa in uu iska baaraa cudurka COVID-19, kaliya dadka laga waayo cudurkaas ayaa la qaadi doonaa, Sidoo kale dadku waa inay haystaan Tikitka diyaaradda ugu dambayn 17ka May, 2020ka oo ah maalinta ugu dambaysa is-diiwaan gelinta”ayaa lagu yiri qoraalka ka soo baxay Safaaradda Soomaaliya ee Nairobi.

Safaaradda Soomaaliya ee Kenya ayaa dhowaan soo saartay wargelin ku aadan in dadka ku xayiran M/ Nairobi ee doonaya in dalka dib ugu laabtaan inay is diiwaan geliyaan, waxaana la soo bandhigay shuruudo la xiriira dadka dib loogu celinayo dalka.

View the full article