Madaxweyme Farmaajo oo falfcelin yaab leh kala kulmay wadahadalkii uu la yeeshay Barham Saalix

[Deeq A.]

Muqdisho (Caasimadda Online) Dadka Soomaalida ee isticmaala barta twitter-ka ayaa siyaabo kala duwan uga falceliyay wadahadal la sheegay inuu dhexmaray madaxweynaha Soomaaliya Maxamed Cabdullaaho Farmaajo iyo dhigiisa dalka Ciraaq Barham Saalix.

Barta rasmiga ah ee Madaxweyne Farmaajo ayaa lagu daabacay xaqiijinta wadahadalka dhexmaray labada masuul, kuwaas oo ka wada hadlay arrimo ku saabsan sida looga hortagi karo xanuunka COVID19 iyo iskaashiga ay ka sameyn karaan la dagaalanka kooxaha loogu yeero argagixisada.

Madaxweynaha Dowladda Soomaaliya oo in ku dhaw Nus Malyan taageerayaal ah ku leh barta twitter-ka ayey dadka ku xiran siyaabo kala duwan uga falceliyeen qoraalka uu madaxweynaha soo qoray oo sidaan u qornaa.

Waxaan khadka telefoonka ku wada hadalnay Madaxweynaha dalka Ciraaq walalakay Barham Saalix. Waxaan ka wada hadalnay xoojinta xiriirka labada dal, dagaalka aan kula jirno ka hortagga COVID19 iyo in 2da dal ay yeeshaan khibrad is dhaafsi ku saabsan ciribtirka fikirka xagjirka ah. pic.twitter.com/EDZxV3AlFY

— Mohamed Farmaajo (@M_Farmaajo) May 6, 2020

Dadkii ka falceliyay waxaa ka mid ahaa Brahim Abdalle qof ku isticmaala oo sooq oray:

“Madaxweyne oo hada Ciraaq Maxaa Dan Ah Oo Noogu Jirto Xiriirkooda Waa Dal Naga Liita Dhan Walba Amni Hadii La Dhaho Anaga Ayaa 100% Ka Fiican Dhanka Nolosha Iyo Dagnaashaha Anaga Ayaa Ka Fiican .. Mar Walba Waxaa La Fiiriyaa Dadka Kaa Koreeya Lama Fiiriyo Kuwa Kaa Hooseeya MUDANE”

Abdirahman Farah qof ku isticmaala ayaa sidoo kale soo qoray: Labo qaawaan isma qaado”

Waxaa jira qof kale oo madaxweynaha weydiiyay goorta uu la hadli doono Ra’isulwasaaraha Itoobiya isagoo leh: “Ciraaq xiriikeedu wax ah miyad ah oo gooni ah malahan hadii la jarane wax dhib ah kuma jiran ee madaxweynuhu gormow qadka kula hadli doonaa ra,iisul wazaaraha ithopia”

Dhannka kale waxaa jira dad badan oo Madaxweynaha ku amaanay sida uu usoo nooleynaayo xiriirka wadamada dibadda, gaar ahaan kuwa carabta, iyadoo Ciraaq la aaminsan yahay iney ka mid tahay dalalka ugu xadaaradda badan dunida.

“Cilaaqaadka Ciraq waan soo dhaweynayaa jaalle madaxweyne muhiimadu maaha dhaqaalaha iyo awoodda maanta ee cilmiga walaalnimada iyo xulufo badsiga siyaasadda intuba waa muhiim” waxaa sidaan soo qoray Shuceyb Dhuubane.

Qof kale ayaa sidaan soo qoray: “Ciraaq waxay ka mid tahay waddamada caalamka ugu cimriga dheer, waa hooyadii aqoonta, waana wax wanaagsan in xiriirdhow aan yeelanno. Wax tarku maaha caloosha oo laguu buuxiyo ee waa cilmiga oo laguu buuxiyo (lagu siiyo)”