Sababta soo riday diyaaradii ku dhacday Bardaale iyo cidda ka dambeysay

[Deeq A.]

Muqdisho (Caasimada Online) – Faahfaahino dheeraad ah ayaa kasoo baxaya sababta ka dambeysay inay soo dhacdo diyaaradii Afarican Express ee galabta ku dhacday duleedka degmada Bardaale ee gobolka Bay.

Lix qof oo saarnayd diyaaradaas ayaa geeriyootay, waxayna siday xamuul, iyadoo ku duulaysay misaafo dhulka u jirta ilaa 670 mitir markii ay dhacday.

Xogo hor dhac ah oo laga helayo baaritaano la sameeyey waxay sheegayaan in diyaaradda ay ku dhaceen wax dhulka laga riday oo la aaminsanyahay inay ahaayeen gantaal.

Mas’uul ka tirsan shirkadda diyaaradaas iska laheyd ee African Express ayaa ku eedeeyey ciidamada Itoobiya oo saldhig ku leh meel u dhaw degmada Bardaale, inay si ula kac ah u soo rideen diyaaradda.

Diyaaraddan ayaa ka kacday magaalada Muqdisho, iyadoo sii martay magaalada Baydhaba, kadibna uga gudubtay magaalada Bardaale ee gobolka Bay, balse inta aysan gaarin garoonka ayey soo dhacday.

Xildhibaan Cabdiraxman Aadan Ibbi oo ka mid ah milkiilayaasha Shirkadda African Express ayaa sheegay in muuqaal Saterlite laga qaaday uu muujinayo in diyaaradda wax lagu dhiftay, xilli ay 5-KM u jirtay runway-ga garoonka diyaaradaha ee magaalada Bardaale.

Sidoo kale Xildhibaanka ayaa qoraal uu soo saaray waxa uu ku sheegay in diyaaradda laga toogtay meel aad ugu dhow garoonka dayaaradaha degmada Berdaale.

Dadka ku dhintay shilkaas oo ah lix qof ayuu magacyadooda ku kala sheegay xildhibaanku Captan Xasan Musse Bulxan, Captan Mubruuk, Captan Cumar, Eng.  Kenyaan ah, masuulkii xamuulka saarnaa diyaaradda Cali Madax-Gaduud iyo wakiilkii Shirkadda Saciid Cabdullaahi Maxamed.