Madaafiic kusoo dhacday gudaha garoonka Injineer Yariisow ee degmada Cabdicasiis

[Deeq A.]

Muqdisho (Caasimada Online) – Wararka aan ka heleyno degmada Cabdicasiis ee gobolka Banaadir ayaa waxa ay sheegayaan in qeybo ka tirsan degmada ay kusoo dhaceen hoobiyeyaal, la aaminsanyahay inay ahaayeen kuwo habow ah.

Ugu yaraan laba madfac, oo la sheegay inay ahaayeen kuwo laga soo riday qoriga loo yaqaano hoobiyaha, ayaa kusoo dhacay qeybo ka mid ah degmada Cabdicasiis, waxuuna mid kamid ah ku dhacay gudaha Garoonka kubadda Cagta ee Eng. Yariisow.

Weli lama oga in khasaare ka dhashay iyo in kale labadaas madfac ee ku soo dhacay qeybo ka tirsan degmada Cabdicasiis ee gobolka Banaadir.

Sidoo kale lama oga halka uu ahaa bartilmaameedka loo waday madaafiicdan, mana jirto cid weli ka hadashay.

Al-Shabaab ayaa dhowr jeer oo hore dusha u ritay mas’uuliyadda weerarro ay u adeegsadeen qoriga hoobiyaha oo ka dhacay meelo muhiim ah oo ka tirsan magaalada Muqdisho.

Inta badan goobaha ay ku qaadaan weerarrada nuucaas ah waxaa ka mid ah xarunta Xalane oo ay maalmihii lasoo dhaafay dhowr gantaal ku tureen, kuwaas oo qaarkood ay waxyeello ka soo gaartay dad rayid ah iyo xoolo u badnaa Geel ku xareysan xaafad ka tirsan degmada Wadajir.