TV-ga Sacuudiga oo laga sii daayey taxane ay u riyaaqeen Yahuudda, kana ka carreysiiyey Falastiiniyiinta

[Deeq A.]

Riyadh (Caasimadda Online) – Dhinacyada Falastiin iyo qaar ka tirsan Shacabka Falastiin ayaa cambaareeyey taxane riwaayad ah oo TV-ga Sacuudiga laga soo daayo,  kaasi oo wax caadi ah ka dhigaya in xiriir lala sameysto Israel, oo xoog iyo si sharci darro ah ku qabsatay dhulka reer Falastiin.

Taxanahan oo lagu magacaabo Umm Haauun, ayaa waxaa sii daaya Taleefishinka Sacuudiga ay lee yihiin ee MBC, oo fadhigiisu yahay Dubai.

Umm Haaruun ayaa qeyb ka ah riwaayadaha iyo musalsalada habeen walba hawada ku jiro inta lagu guda jiro bisha barakeysan ee Ramadaan oo bilaabatay Asbuucii hore, waxaana soo dhoweeyey oo qeexid wanaagsan ka bixiyey warbaahinta Yahuudda iyo Reer Galbeedka.

Waxa uu ka sheekeynayaa kalkaaliso caafimaad oo Yahuud ah, taasi oo ay aad u jecel yihiin deriskeeda, sida taxanaha lagu muujinayo, maadaama ay tahay qof wanaagsan.

Wuxuu sidoo kale muujinayaa Yahuudda iyo Muslimiinta oo si deris wanaag ah ku wada nool, oo xitaa qaarkood ilmahooda ay dhex-marayaan xiriir jaceyl. Musalsalka ayaa waxaa la muujinayaa in waqtigiisu yahay 1948-kii, xilligaas oo ahayd markii Yahuud badan ay ku noolaayeen dalalka Carabta, iyo markii Israel ay qabsatay dhulka Falastiin.

Hazem Qassem, oo ah afhayeen u hadlay ururka Xamaas, oo ah kooxda xukunta marinka Gaza, ayaa sheegay in riwaayadaha TV-ga ay tahay inay ka tujumaan dadka iyo fikradahooda balse aysan aheyn in qaab kale laga dhigo.

“Qaar ka mid ah riwaayadaha Carbeed ee la soo saaray sannadkan ma ixtiraamaan arrintaan, waxay faafinayaan fikrado dadka ugu yeerayo inay si caadi ah ula noolaadaan gumeysiga Israel lana jeclaado, waxayna isku dayayaan inay su’aal ka keenaan qadiyadda Falastiin,” ayuu Hazem Qassem u sheegay wakaaladda Wararka ee Anadolu.

Qaasim ayaa intaas kusii daray “Israel waa cadow, waligeedna way sii ahaan doontaa cadowga koowaad ee wadamada Carabta”.

Musab al-Braim, oo ah afhayeenka Xarakada Islamic Jihaad ee Falastiin, ayaa sidoo kale dhaleeceeyey musalsalkaan laga sii daayo TV-ga Sacuudiga isagoo ku tilmaamay inay tahay “dharbaaxo taariikhi ah” oo ku dhacday dhammaan Carabta iyo Wadamada islaamka.

Salama Marouf, oo ah madaxa Xafiiska warbaahineed ee dowladda ka talisa marinka Gaza, ayaa sheegay in ruwaayadaan laga sii deynayo TV-ga Sacuudiga ay muujineyso rabitaanka ah in wax laga badalo dareenka Carabta ay ka qabaan arrimaha Falastiin.

“Baaqa ah in xiriir caadi ah lala yeesho Israel waa hoos u dhac xagga akhlaaqda iyo anshaxa, gaar ahaan marka uu baaqaas ka yimaado dalalkii iyo xisbiyadii ay aheyd in ay kamid noqdaan safafka hore ee kuwa u doodayo xuquuqda koowaad ee Falastiin” ayuu yiri.

Saraakiisha Dowladda Sacuudiga weli ma aysan ka hadlin arrintaan dooda weyn ka dhex dhalisay dowladaha Carabta ee ku saabsan in dadka la jecleysiiyo Yahuuda.