Faroole, Gaas iyo Jurile oo ku baaqay in xukuumadda Puntland looga dambeeyo gurmadka Qardho

[Deeq A.]

Madaxweynayaashii hore ee Puntland, Cabdiweli Gaas iyo Cabdiraxmaan Faroole, oo uu weheliyo Senetor Jurile oo ka tirsan Aqalka Sare ee Baarlamanka Federaalka Soomaaliya, ayaa ku baaqay in xukuumadda Puntland looga dambeeyo hawlaha gurmadka Qardho.

Faroole, Gaas iyo Jurile oo haatan warbaahinta kula hadlay caasimadda Garoowe, ayaa ugu horrayn bogaadiyay dadaallada ay xukuumadda Puntland hormuudka u tahay ee loogu gurmanayo shacabka magaalada Qardho, kadib fatahaaddii khasaaraha badan dhalisay ee halkaasi ka dhacday.

Saddexdooduba, Waxay cod midaysan ku sheegeen in ay madaxweynaha Puntland ku taageersan yihiin, guddiga uu u magacaabay gurmadka shacabka Qardho, ee waxyeelladu ka soo gaartay daadadkii ku rogmaday degmadaasi.

Sidoo kale, waxay sheegeen in aan marnaba la aqbali Karin, in guddiyo kale laga dhinac sameeyo guddiga gurmadka Qardho ee dowladdu magacowday, sidaas darteedna cid kasta oo wax bixinaysa ay ku hagaajiso guddiga dowladda Puntland.

Ugu dambyentii, waxay u mahad-celiyeen dowladda Federaalka Soomaaliya oo si deg deg ah uga soo jawaabtay gurmadka Qardho, islamarkaana Puntland soo gaarsiisay lacag dhan hal milyan oo Dollar.

PUNTLAND POST

The post Faroole, Gaas iyo Jurile oo ku baaqay in xukuumadda Puntland looga dambeeyo gurmadka Qardho appeared first on Puntland Post.