DF oo qalab caafimaad iyo dawo gaarsiisay maamul gobaleedkii labaad (Aqriso)

[Deeq A.]

Jowhar (Caasimada Online) – Mas’uuliyiin ka socota xukuumadda oo ay hoggaaminayen howl-wadeenno ka tirsan xafiiska Ra’iisul Wasaaraha ayaa qalab caafimaad iyo dawooyin gaarsiiyay dowlad gobaleedka Hirshabeelle si ay awood ugu yeelato la tacaalidda xanuunka COVID-19.

Qalabka caafimaad ee HirShabeelle lagu wareejiyay waxaa kamid ah qalabka Sheybaarka iyo dharka ay xirtaan howl-wadennada ka howl gala xarumaha lagu daweeyo bukaannada uu soo rito COVID-19.

Qalabka Shaybaarka ee maanta lagu wareejiyay Hirshabeelle ayaa awood u siinaya inay dadka ka baaraan COVID-19.

Dowlad gobaleedka Hirshabeelle ayaa ka mahad celisay dawada iyo qalabka caafimaad ee dowladda federaalku ku wareejiyay.

Howl-wadeennada farsamo ee Jowhar geeyay taageerada xukuumaddu ku xoojineysay awoodda HirShabeelle ee xakameynta Feyruska Karoona ayaa sidoo kale socdaalkoodu salka ku hayay inay Qiimeyn ku sameeyaan xaaladda guud iyo xarumaha loo qorsheeyay in dadka lagula tacaalo, si loo ogaado baahida jirta, looguna qorsheeyo taageerada dheeraadka ah ee ay u baahanyihiin.

Dowladda ayaa sidoo kale maalin ka hor waxay dowlad gobaleedka Koonfur Galbeed ku wareejisay dawo iyo agab caafimaad oo qayb ka ah taageerada dowladdu ugu tala gashay in dowlad gobaleedyad looga caawiyo dagaalka ay ugu jiraan ka guuleysiga cudurka COVID-19.