Koox uu Muqdisho kula qarxay qarax ay diyaarinayeen iyo dad lagu dilay magaalada

[Deeq A.]

Muqdisho (Caasimada Online) – Wararka aan ka heleyno degmada Kaxda ee gobolka Banaadir ayaa sheegaya in caawa degmadaas lagu dilay laba qof oo shacab ah, sida dadka deegaanku u sheegeen Caasimada Online.

Askari ka tirsan ciidamada Booliska ee ka howlgala degmadaas ayaa geystay dilkaas, kadib markii uu rasaas ku furay dad shacab ah, sidoo kale waxaa ku dhaawacmay rasaastaas laba qof oo kale.

Dadka deegaanka ayaa sheegay in askariga iyo dadka uu rasaasta ku furay oo hal goob ku sugnaa uu muran soo kala dhex galay taas oo keentay in uu dhowr xababadood ku rido. Isagoo intaas kadibna goobta isaga baxsaday.

Ciidamo ka tirsan kuwa ammaanka ee ka howlgala degmada Kaxda ayaa goobta gaaray welina kuma guuleysan in ay gacanta ku soo dhigaan askarigii falkaas geystay, sida ay noo xaqiijiyeen dadka deegaanka.

Dhanka kale ugu yaraan seddax dhalinyaro ah ayaa dhimasho iyo dhawacyo ku noqday qarax ay ku aasayeen Jidka Warshadaha oo ku qarxay, sida ay noo sheegeen saraakiil ciidan.

Ragaas ayaa qaraxa ku aasyey agagaarka isgoyska Soos ee degmaad Hiliwaa, waxaana halkaas ku geeriyooday mid kamid ah ragii qaraxa wadada ku aasayey, halka laba kalena ay ku dhaawacmeen.

Sawirro laga soo qaaday dhalinyaradaas ayaa muujinaya in mid kamid ah uu qaraxu kala gooyey, halka labada kalena ay ka muuqdaan dhaawacyo daran oo kasoo gaaray qaraxaas.

Durbadiiba ciidamada dowladda oo aan sidaas uga fogeyn halka ay gelinayeen qaraxaas ayaa gaaray goobta, waxayna kasoo qaadeen meydka midkii dhintay iyo dhaawaca labadii kale.

Laamaha ammaanka dowladda Soomaaliya weli wax faahfaahin ah kama bixin dhacdooyinkaas ka kala dhacay degmooyinka Kaxda iyo Hiliwaa oo ka wada tirsan gobolka Banaadir.

Inta badan Al-Shabaab ayaa sheegtay qaraxyo la geliyo jidka Warshadaha, waxaana lala beegsadaa gaadiidka ay wataan ciidamada AMISOM, kuwaas oo iyaguna  jiha kasta rasaas u fura qaraxa kadib, waxayna mararka qaar xasuuq wadareed u geystaan dadka ka agdhow aaga qaraxa lagula eegto.