Dagaal ka dhex qarxay Ciidamada is-maamul goboleedka Puntland+Sarkaal lagu dilay & Xoggo kale

[Deeq A.]

Dagaal ka dhex qarxay Ciidamada is-maamul goboleedka Puntland+Sarkaal lagu dilay & Xoggo kale

Marxuum Axmed Careef

Wararka ka imaanaya Magaalada Dangoroyo ee Gobolka Nugaal, ayaa sheegaya in maanta oo Jimce ah Magaaladaasi uu dagaal noocyada kala duwan ee hubka laysku adeegsaday ka dhex qarxay ciidamo ka wada tirsan Ciidamada Maamul-goboleedka Puntland.

Saraakiil ka gaabsaday in magacyadooda la xigto ayaa Warbaahinta u xaqiijiyay in is-rasaasayntu dhexmartay askar ka tirsan Ciidanka Puntland oo gaadhi Tikniko ah kala baxsaday Buuraleyda Galgala iyo ciidan kale oo Jidgooyo ku sameeyay xilli ay marayeen nawaaxiga Magaalada Dangoroyo.

Is-rasaasaynta labada dhinac dhex martay, ayaa sida la xaqiijiyay waxa ku geeriyooday sarkaal magaciisa lagu sheegay Axmed Careef oo ka tirsanaa Istaafka Taliyaha Ciidanka Daraawiishta Puntland Gen. Yaasiin Cumar Dheere,Yeelkeede weli lama soo werin khasaare dhabta aha ee ka dhashay isku-dhacaa labada Ciidan.Geesta kalena waxaa xogguhu tibaxayaan in gacanta lagu dhigay qaar ka mid ah askartii gaadhiga tiknikada la soo baxsaday.

 

Qaran News