Boosaaso: Daacish oo lala xiriiriyay weerar lagu dhaawacay Nabaddoon

[Deeq A.]

Nabadoon Cabdullaahi Cali Sugulle

Wararka ka imaanaya magaalada Boosaaso ee xarunta Ganacsiga Puntland, ayaa sheegaya in halkaasi fiidnimadii caawa lagu dhaawacay Nabaddoon Cabdullaahi Cali Sugulle oo kamid ah odayaasha dhaqanka gobolka Bari.

Saraakiil ka tirsan Laamaha Amniga gobolka Bari, ayaa Warbaahinta Puntland Post u sheegay in Nabaddoonka lagu weeraray albaabka hore ee gurigiisa oo ku yaalla xaafadda masjid Faadumo ee magaalada Boosaaso.

Weerarka ayaa dhacay wax yar kadib markii laga soo baxay salaadda Cisha, xilligaasi oo Nabaddoonku sii galayay gurigiisa, balse inta uusan Albaabka gaarin Rasaas lagu furay, sida ay xaqiijiyeen Laamaha Amniga Boosaaso.

Dableey hubaysan ayaa la sheegay in ay Nabaddoon Sugulle u galeen meel u dhow Albaabka gurigiisa, kadibna ay Rasaas kala dhaceen qaarka sare ee jirkiisa. Rasaastaas oo dhaawac culus gaarsiisay Nabaddoonka.

Dableeydii weerarka geystay ayaa goobta isaga cararay, iyadoo weli aysan jirin cid sheegatay mas’uuliyadda weerarka, inkastoo saraakiil dhanka Amniga ah ay la xiriiriyeen kooxda Daacish ee ku sugan buuraleyda Cal-miskaat ee gobolka Bari.

PUNTLAND POST

The post Boosaaso: Daacish oo lala xiriiriyay weerar lagu dhaawacay Nabaddoon appeared first on Puntland Post.