Xiisad dagaal oo weli ka taagan tuulada Dalsan

[Deeq A.]

Wararka naga soo gaaraya Jubbada Hoose ayaa sheegaya in weli xiisad dagaal oo u dhexeyso laba maleeshiyo beeleed laga dareemayo tuulada Dalsan ee gobolkaasi.

Dhaq dhaqaaqyo u dhexeeya labada dhinac oo maalmihii u dambeeyey ku dagaalamay Dalsan ayaa weli ka socda halkaasi.

Sidoo kale dadka deegaanka ayaa bilaabay barakac, si ay uga fogaadaan waxyeello ka soo gaartay dagaalka labada dhinac.

Maleeshiyaadkaan oo iska dilay in ku dhowaad 30 ruux ayaa haatan isku horfadhiyo goobihii lagu diriray.

Nabadoon Cabdinuur Cabdulle (Dulmi Diid) oo la hadlay Idaacadda Shabelle ee magaalada Muqdisho, kuna sugan tuulada Dalsan ayaa baaq nabadeed u diray beelaha dagaalamaya, wuxuuna sidoo kale ka dalbaday inay wax weliba ku dhameeyaan miiska wadahadalka.

Dhinaca kale waxaa maanta degmada Kismaayo lagu qabtay dibadbax nabadeed oo looga soo horjeedo colaada ka taagan duleedka magaaladaasi.

Qaar ka midah dadweynaha ku dhaqan halkaasi ayaa isugu soo baxay waddooyinka iyaga oo inta badan xirnaa maryo cad cad oo muujinayaa astaan nabadeed, waxayna ugu baaqeen maleeshiyaadka beelaha diriraya inay si deg deg ah dagaalka ku joojiyaan.

Xiisadaan oo taagneyd dhowrkii cisho ee la soo dhaafay ayaa sababtay dhimasho, dhaawac iyo barakac intaba.

View the full article