Saraakiil ka tirsan milateriga Somalia iyo xubno Shabaab ah oo xabsi la isugu geeyey

[Deeq A.]

Muqdisho (Caasimada Online) – Dowladda Soomaaliya ayaa xabsiga dhexe u gudbisay Gaashaanle Sare Cali Maxamed Nuur oo ahaa Taliyaha Guutada 1-da April, gaashaanle Aadan Axmed Cali Gaaseey, oo ahaa abaanduulaha Guutada 1-da April, iyo saraakiil kale, kuwaas oo ahaa Saraakiishii hogaamineysay ciidankii ay Al-Shabaab ku laayeen xerada Ceelsaliini ee gobalka Shabeelada Hoose.

Xog ay heshay Caasimada Online ayaa sheegeysa, in saraakiishaan oo xukun sugayaal ah la geeyay Xabsiga dhexe, islamarkaana ay wajahayaan halis amni, sida ay noo xaqiijiyeen xubno ka tirsan ehaladooda oo la hadlay Caasimada Online.

Ehellada ayaa sheegay in saraakiishaan la geliyay qol ay ku jiraan rag ku eedeysan in xubno ka yihiin Al-Shabaab oo maxkamad sugayaal ah, kuwa Al-Shabaab ah oo xukun ku dhacay iyo qaar kale oo ku eedeysan fal dambiyeedyo kale.

Qaar ka mid ah ehellada ayaa qaba in saraakiisha ay wajahayaan halis amni maadaama iyagoo tiro yar loo geeyay koox ah Al-Shabaabnimo ku eedeysan iyo qaar lagu helay oo xukun ku dhacay oo dhamaantoodba hal qol ku jira.

“Wiilkayga waxaa lagu xiray qol ay ku jiraan rag badan oo Al-Shabaab ah, waxa uuna halis ugu jiraa in halkaas lagu dilo waayo waa ka tiro badan yihiin waana Sarkaal dowladeed” ayey tiri Hooyada dhashay mid kamid ah Saraakiisha Xabsiga loo gudbiyay.

Dhawaan Xabsiga waxaa daryeel la’aan ugu geeriyooday mid kamid ah Maxaabiista Xabsiga, kaas oo ay waalidiintiisa sheegeen in la dayacay.