Xiisada Somalida iyo Cafarta oo xoogeysatay, kadib markii weerar lagu dilay 17 Qof

[Deeq A.]

 Addis Ababa (Caasimada Onine) – Wararka naga soo gaaraya Itoobiya ayaa sheegaya in ay sii xoogeysatay xiisada u dhexeysa Soomaalida iyo Cafarta dalkaasi.

Xiisada ayaa ka sii dartay, kadib markii saacadihii la soo dhaafay weerar xoogan lagu dilay 17 qof oo ka soo jeeda Cafarta, laguna dhaawacay in ka badan 30- kale.

Weerarkan ayaa la sheegay in ay geysteen ciidamada Booliska ee Ismaamulka Soomaalida Itoobiya.

Wararka ayaa sheegaya in dadka lagu dilay weerarkaasi ay isugu jiraan Caruur, Haween iyo dad Da’ ah.

Xaaladda ayaa hadda kacsan, iyadoona labada dhinac ay wadaan dhaq dhaqaaqyo iska soo horjeeda, waxaana markasta la filaan karaa in dagaal uu qarxo.

Mas’uul ka tirsan gobolka Cafarta oo la halday VOA-da qeybteeda afka Axmaarada ayaa  sheegay in dadka la dilay ay ku jiraan afar Haween ah iyo cunug yar oo 6 bil jir ah.

Dhinaca kale ma jiro weli wax hadal ah oo ka soo baxay ismaamulka Soomaalida oo ku aadan weerarkaasi.

Dhowan ayey aheyd markii 14 Qof oo Soomaali ahaa ay dileen ciidamada Cafarta oo dhul boob ka wada halkaasi.

Caasimada Online
Xafiiska Addis Ababa
caasimada@live.com