Xog: Oomaar oo billaabay hab gaadiidka Muqdisho uu lacag badan uga sameynayo

[Deeq A.]

Muqdisho (Caasimada Online) – Wasiirka wasaaradda gaadiidka Soomaaliya Maxamed Cabdullaahi Oomaar, ayaa heshiis ganacsi oo ku kacaya dhaqaale xoog leh la galay laba xarun oo ku yaalla magaalada Muqdisho.

Xarumahaan oo kale ah, mid caafimaadka gaadiidka lagu baaro iyo mid lagu baaro caafimaadka wadayaasha gaadiidka, ayaa dadweynaha ku soo rogay lacago xad dhaaf ah.

Dadka doonaya in ay sameestaan shatiga iyo kuwa doonaya in ay cusbooniistaan Buugga gaariga, ayaa qasab looga dhigay in ay soo maraan, xarun lagu baaro caafimaadka gaadiidka oo lagu magacaabo Daacad Car Care.

Xaruntaan ayaa baaritaanka ku sameyneysa lacag dhan 25$, waxaana baaritaanka kadib hadii cilad yar lagu arko ay waajib tahay in gaariga la cilad bixiyo, xataa hadii uu ku shaqeyn karo ciladaasi.

Sidoo kale goob lagu baarayo caafimaadka wadaha gaariga ee la siinayo Leesinka, ayaa laga furay gudaha Wasaaradda, waxaana baaritaanka qofka lagu qaadanayaa lacag ku dhow 25$.

Qofkii aan warqad ka heysan labadaan xarun, wasaaradda gaadiidka Soomaaliya uma ogola in loo cusbooneysiiyo Buugga iyo in la siiyo Leesin, waxaana sidoo kale hadii uu dariiqadaasi soo maro u soo dheer lacagtii kale oo lagu qaban lahaa adeegga uu doonayo qofka soo codsaday.

Qaar kamid ah shacabka magaalada Muqdisho ayaa maalmihii la soo dhaafay qabay walaac xoog leh oo arrintaan ku saabsan mana jirto wax war ah oo ka soo baxay dowladda Soomaaliya oo la xariirta cabashada dadweynaha.

Inta badan wasaaradaha dowladda federaalka ayaa mar walba la yimaada mashruucyo ay ku xaqiijin karaa inay lacag dheeri ah kusoo gasho, ayaga oo qandaraasyo siinaya shirkado lacagta ay wada qeyb-sadaan.

Caasimada Online
Xafiiska Muqdisho
caasimada@live.com