Shirkadda Caymiska Takaful oo qalab ku wareejisay taliska Taraafikada Puntland

[Deeq A.]

Shirkada Caymiska ee Takaful ayaa maanta agab dhar ah ku wareejisay taliska ciidanka nabad gelyada wadooyinka Puntland ee loo yaqaano Taraafikada.

Agabkaan oo ka koobnaa dareeska ay xirtaan ciidamada Taraafikada, ayaa shirkada Caymiska Takaful waxay sheegtay in ay ugu talo gashay sidii ciidamada uga caawin lahayd shaqooyinkooda maalinlaha ah.

Madaxa Takaful ee Puntland Maxamed Xasan ayaa sheegay shirkadoodu inay caymis galiso gaadiidka laga isticmaalo Puntland, sidaa awgeedna loo baahan yahay in kor loo qaado isku xirnaanta iyo wada shaqaynta shirkada iyo laamaha taraafikada Puntland.

Taliyaha ciidanka Taraakifada gobolka Nugaal, Ismaaciil Xirsi Shirwac (Qabaal), ayaa uga mahad celiyay shirkada Takaful taageerada agab ee ay ufidisay laanta nabad gelyada wadooyinka.

Ismaaciil Qabaal waxaa uu qiray in Puntland baahi weyn looga qabo adeegga Caymiska gaadiidka maadaama uu aad u badan yahay khasaaraha  hantiyeed ee ka dhasha shilalka gaadiidka.

Taliyaha guud ee ciidanka taraafikada Puntland, Axmed Cabdi Cali (Qalyare), ayaa sheegay maqnaanshaha kaalinta Ceymiska inay tahay mid kamid ah dhibaatooyinka ugu waa weyn ee dalka ka jira, wuxuuna yidhi.” Ceymisku waa xalka dhibaato aan la aqoon xilliga ay kugu dhacayso. Waa dhibaatadii qofka si gaar ah ugu dhacday oo lala qeybsanayo.

Shirkadda Takaful, waxay ka shaqaysaa Adeegyada caymiska ee Bariga iyo badhmaha Qaarada Afrika.  waxay bixisaa adeegyada caymiska oo dhan, sida Caafimaadka, gaadiidka, guryaha iyo Socdaalka Badaha, kuwaasoo ku shaqeeya Nidaamka Islamic Insurance ama Caymiska Islaamiga ah.

Puntland Post

The post Shirkadda Caymiska Takaful oo qalab ku wareejisay taliska Taraafikada Puntland appeared first on Puntland Post.