Beesha Reer Ow Xassan oo 10 kun oo Doolar geysay tacsida Eng. Yarisoow

[Deeq A.]

Muqdisho (Caasimadda Online)- Culimo, Sareeyaal, Saraakiil, Odayaal iyo Siyaasiyiin ka socday beesha Reer Ow Xasan, uuna hor kacayay Gen. Axmed Dhayib Sheekh Axmed Daahir (Dhaga-caleen) ayaa maanta tacsi iyo baroor diiq ugu tagay ehelada iyo Ugaasyada beesha Mudullod ee uu ka geeriyooday Allaha u naxariistee marxuum Eng. Cabdiraxmaan Cumar Cismaan “Yariisow”,.

Gen. Dhagaleen oo ku hadlay magaca beesha Reer Ow Xassan ayaa gogosha tacsida Injineer Yariisow gudoonsiiyay lacag dhan 10,000$ (Toban kun oo dollar Mareykan ah).

General Axmed Dayib dhagacaleen oo markii uu hadlayay ay ka muuqatay murugo xoog leh ayaa sheegay inuu Eng. Yarisoow ahaa shaqsi afgaaban, dulqaad badan, howl kar ah oo Soomaali oo dhan ay u simantahay.

Waxaa tacsidaasi tagay 30 qof oo hogaanka beesha Reer Ow Xassan ah, waxaana kamid ahaa Xildhibaanka beesha ee Hir-shabeelle Xil. Mahad Xassan Cismaan iyo Xil. Cabdirashiid oo ah Wasiiru Dowlaha Was. Maaliyadda ee K/Galeed.

Gogosha waxaa hadallo kasoo jeediyay Axmed Nuur Macallin oo ku hadlay magaca Odayaasha Dhaqanka, Amb. Xuseen Xaaji Axmed (Safiirka Soomaalia ee Koonfurta Sudan) Mukhtar Muxumed Yuusuf oo hore u ahaa Gudoomiye ku xigeenka BFS, , Garyaqaan Barre Gagamey iyo Shekh Cabdullaahi Guuraa oo ku hadlay magaca Cilimada kaas oo ka duceeyay gogoshaasi tacsida ah.

Dhinaca kale waxaa tacsida guddoomay Ugaasyada beel weynta Mudullood oo uu ugu horeeyo Ugaas Maxamuud Cali Ugaas, waxayna dhamaantod bogaadiyeen kaalinta ehelnimo, wada dhalasho iyo taariikhda soo jireenka ah ee labada beel, iyagoo xusay in tallaabadan ay sii xoojin doonto xiriirka walaalnimada iyo waalidnimada ku dhisan. Waxaana la isla qiray In Marxuumka uu ka wada dhintay dadka oo dhan, waxaana loogu duceeyay si wadar ah.