Xog: Qodobka xasaasiga ah ee ay isku hayaan Kheyre iyo Macallin Maxamuud

[Deeq A.]

Dhuusomareeb (Caasimada Online) – Caasimada Online ayaa xog cusub ka heshay xiisadda cusub ee u dhaxeysa ra’iisul wasaare Xasan Cali Kheyre iyo kooxda Ahlu-Sunna, xilli la rumeysnaa in ra’iisul wasaaraha uu soo afjaray dhibaatadii Galmudug.

Ilo-wareedyo lagu kalsoon yahay ayaa Caasimada Online u sheegay in waxa ugu weyn la isku hayo ay tahay 35 xildhibaan oo Ahlu-Sunna ay dooneyso inay ku yeelato baarlamanka cusub ee  Galmudug.

Arrintan ayaa waxaa la sheegay inay hore isugu afgarteen ra’iisul wasaaraha iyo Macallin Maxamuud oo ah hoggaamiyaha Ahlu-Sunna. Si kastaba, inta badan beelaha Galmudug ayaa ku gacan seeray in xildhibaanadooda la hoos geeyo Ahlu-Sunna, waxayna dalbadeen in ay beel ahaan u qaataan.

Ra’iisul wasaaraha oo markii hore raali ka ahaa in Ahlu-Sunna ay maamusho 35 xildhibaan, balse qaab beel ahaan ay u qeybisyo, ayaa beddelay mowqifkiisa kadib markii uu ogaaday inay sii kordhayaan beelaha diidan arrintan, xilli markii horeba ay dhowr beelood diidanaayeen.

Kheyre si rasmi ah uma diidin dalabka Ahlu-Sunna, balse wuxuu isku dayayaa inuu maaweeleeyo ilaa shirka Galmudug, hase yeehsee Ahlu-Sunna ayaa dalbatay in heshiiska qodobkan si rasmi ah loo saxiixo, islamarkaana beesha caalamka ay marqaati ka noqoto

Ahlu-Sunna ayaa rumeysan in haddii ay soo xusho 35 ka mid ah xildhibaanada Galmudug ay maamuli doonto doorashada, islamarkaana xaqiijin karto in madaxweyne uu noqdo qofka ay ayada dooneyso.

Dowladda ayaa maanta isku dayday in ciidamo dheeraad ah la geeyo Dhuusomareeb si ay awoodda halkaas ugu qabsato Ahlu-Sunna, hase yeeshee Ahlu-Sunna oo ka war heshay ayaa ciidan badan gaysay garoonka, kana hortagtay isku daygan.

Xiisadda ayaa hadda aad u kacsan, waxaana arrintan ku jira wasiirka arrimaha gudaha Soomaaliya Sabriyem, oo isku dayaya inuu isku soo dhoweeyo Kheyre iyo Macallin Maxamuud.

Caasimada Online
Xafiiska Dhuusomareeb
caasimada@live.com