Ethiopian Arlines oo duullimaadyo joogta ka bilaabaysa garoomada Caalamiga ah ee Puntland

[Deeq A.]

Shirkadda diyaaradaha dalka Ethiopia, ayaa jimcihii shalay shaacisay in ay si rasmiya duullimadyo uga bilaabi doonto, garoomada caalamiga ah ee Puntland 15-ka bisha Luuliyo ee soo socota.

Qoraal ka soo baxay Ethiopian Airlines, ayaa lagu sheegay in laga bilaabo 15-ka bisha Luuliyo ee sannadkan 2019,  ay shirkaddu duullimaadyo joogta ah ku tegi doonto caasimadda Puntland ee Garoowe iyo magaalada Boosaaso ee xarunta gobolka Bari.

Madaxweynaha Puntland Siciid Cabdullaahi Deni,  ayaa 12 bishan June magaalada Addis Ababa kulan kula qaatay madaxa Fulinta  ( CEO) shirkadda duulimaadyada  Ethiopia Mr. Tewolde Gebre Mariam, Ku-xigeenka madaxa Qorshaynta iyo Iskaashiga Mr. Busera Awel iyo madaxa Suuqgeynta Geesta Africa ee shirkadda Mr. Yemene Fitwi.

Kulankaasi ayaa looga wada-hadlay, sidii shirkadda duullimaadyada Ethiopia ay Puntland uga hirgelin-lahayd duulimaadyo joogto ah, kuwaas oo xoojinaya, qaybna ka noqonaya xiriirka ganacsi ee ka dhexeeya Puntland iyo  Ethiopia.

Shirkadda ayaa xilligaasi magacowday, guddi farsamo oo u kuurgal ku sameeya habka shaqo ee garoonka diyaaradaha caalamiga ee Garoowe, kuwaasi oo bartamihii bishan June diyaariyay xog dhammaystiran oo ku aaddan Garoonka.

Ehiopia iyo Puntland, waxaa ka dhexeeya xiriir ganacsi iyo mid amni oo wanaagsan, waxaana Garoowe ka furan qunsuliyad ay leedahay Ethiopia oo ka shaqeysa fududeynta isu’socodka dadka iyo ganacsiga labada dhinac.

PUNTLAND POST

The post Ethiopian Arlines oo duullimaadyo joogta ka bilaabaysa garoomada Caalamiga ah ee Puntland appeared first on Puntland Post.