Deeq A. Posted June 24, 2019 Ugu horayn, waxaad moodaa in sanadahan u dambeyey ay aad u soo tarayso xumaanta iyo foolxumadii adeegsiga qabyaaladu, oo meesha ka saaraysa qarannimada kana dhex abuuraysa bulshada xanuuno iyo nacaybshiyo aad u fog oo keeni karaysa kala fogaansho iyadoo xumaan iyo xiqdi ku abuuraysa bulshadii qaranimada ku heshiisay. Qabyaaladu waa xanuun guud ahaan soomalida saamayn wayn ku yeeshay, hoosna uga soo riday meeqaanki ay lahaayen ilaa hadana dawadiisi aan la helin oo ay muhiim tahay in la goobo sidii ama xeeladii lagaga bogsan lahaa xanuunkan liddiga ku ah horumarka iyo wax wada qabsiga ummada. Somaliland ahaan dawladnimada iyo qaranka waxaan u yagleelanay si aan ugaga guurno qadhmuunka iyo xumaanta ay qabyaaladu leedahay, si aan u asaasano qaran aan ku dhisnayn qolo iyo qabiil toona, laakiin waxa hada muuqata in qabyaaladi dib u soo if baxdey oo xitaa ay ka awood badatey qaranimada iyadoo aad maqlayso odeyaal cuqaal sheeganaya oo ahaa kuwi qarannimada iyagu ilaalin lahaa oo leh qabiilkayaga hadaan sidaa loo samayn somaliland anagu kama mid nihin, kaliya shuruud daciifa ayuu ku xidhey ka mid ahaanshiyaha qaranka. Doorashooyinka waxa loogu talo galay in ay hore socod iyo hiigsi fiican ku lahaadan dawlad wanaaga, se waxa cad in doorashoyinki ay kaw ka noqdeen arimaha hurinaya qabyaalada. Iyadoo aynu tusaale cad u soo qaadanayno doorashadii ugu dambaysay ee madaxtinimada ee ay soo shaac baxeen reero qabiilnimada ku bahoobayey sida “JEEGAANTA”. May dhicin doorashoyinkii hore in qabyaaladu heerka intaas leeg gaadho oo la samaysto magacyo qabyaaladaysan oo doorashada lagu gallo si loogu guulaysto. Ugu dambayn waxa muhiima in lagu dadaalo sidii qabyaalada meesha iyo heerka ay joogto hoos looga dhigi lahaa amase loo baabi’in lahaa hadii ay suurto gal tahay. Halkan hoose waxan idinkula wadagaya tix kooban oo ka hadlaysa qaybyaalada. QABYAALADI WAA QUDHUN Dadyow Qaran wayne Qabyaaladu maaha Qabiil iyo reero Qoom iyo umad maaha Qaran dhana maaha Quraaniyo maaha Qaanuun laga reebay Quruun hore maaha Qoraal nebi maaha Xadiis qoran maaha Qiraaliyo maaha Gar geed lagu qaadey Qabyaaladu maaha Qawl iyo hadal fiican Qiraal saxa maaha Qarana u dan maaha. Dadyow qaran wayne Qabyaaladu waa uf Qadhmuun iyo weeye Qadhaadh aan la muudsan Qawl aan sax ahayniyo Qaran dumis weeye Qabiil wax ka sheegid Qabiilna ku faanid Quruun isku cayna Qaadirku u abuuray Qabiil ugu dooray Keliya is qirtaan Ayeyba u qaateen Qoqobiyo kala soocid Qabiilkayagaa san Quruun saxa weeye Qofkii aan ahayna Qoom hoogayba weeye Dadyow qaran wayne Qabiil lagu faano Qabyaaladu weeye Quruun isirkeeda Qab iyo isla wayni Qumaati u caydo Qolo iyo haybtooda Qalooc ku tilmamto Qabyaaladu weeye W/Q: Ahmed Harir Adam Gmail: heebaan6926@gmail.com Hargaysa, Somaliland Qaran News Share this post Link to post Share on other sites
