Xildhibaan Saabir Oo Sharci-darro Ku Tilmaamay Warqadda DF ee Galmudug, Kana Hadlay Xalka iyo Doorashada

[Deeq A.]

Xildhibaan Saabir Shuuriye oo ka tirsan xildhibaannada golaha shacabka ee baarlamaanka federaalka ah, oo deegaan doorashadooduna tahay Galmudug ayaa sharci-darro ku tilmaamay qoraal ay soo saartay wasaadaradda arrimaha gudaha ee dowladda federaalka ah oo la xiriiray doorasho ka dhacdo dowlad goboleedka Galmudug.

Xildhibaan Shuuriye oo la hadlay Goobjoog News ayaa waxaa uu yiri” Waa go’aan aan dastuurka heer federal iyo mid Galmudug waafaqasaneen,  laguna kala qaybinayo bulshada reer Galmudug ee ma aha war xal iyo isku soo dhawaansho keenaya”.

Xildhibaan Saabir ayaan sidoo kale weydiinney iney dhici karto doorasho, isaga oo ka jawaabaya waxaa uu yiri “Waxaan is leeyahay iney dhacayso doorasho laakin dib u heshiisiin iyo is afgarad siyaasadeed ayaa ka horeeya, si xoog ah kuma dhici karto doorasho”.

Ugu dambeyntii, waxaa uu xildhibaan Saabir Shuuriye wax ka dhahay sida uu xalka ku jiro “ Waxaan u arkaa in siyaasiyiinta ka soo jeeda Galmudug ay masuuliyadda qaataan,  iskuna keenaan bulshada la kala geeyay, deegaanka tagaan dib u heshiinta dhab ah qabtaan, oo ay process galiyaan sidii ay ku qabsoomi lahayd doorasho loo dhan yahay, kana madaxbannaan faragalinta  Nabad iyo Nolol” isaga oo sii raaciyey “Lakin wax dhici kara 4-ta July ee wasaaraddu sheegtay suuragal ma ahan ee waa war iska dhalanteed ah oo xalay 2pm la iska soo tuuray”.

Arrintan xildhibaanka waxaa ay imaaneysaa kadib markii wasaaradda arrimaha gudaha ee dowladda Federaalka ay xalay saqdii dhexe soo saartay qoraal ku aadan doorasho ka dhaceysa Galmudug, iyada oo ku baaqday in la qabto xilligii loogu talo-galay.

Wasaaraddu waxaa ay sheegtay muddada xilheynta madaxda Galmudug ay ku egtahay 4-ta July ee sanadkan, isla markaana loo baahanyah in la qabto shirweyne arrimaha looga tashto.

Goobjoog News

Source: goobjoog.com