Taliye Xuseen Dheere oo si heer sare loogu soo dhoweeyay Xiingalool

[Deeq A.]

Shacabka Xiingalool oo soo dhoweeyay G/sare Xuseen Dheere

Gaashaanle Sare Xuseen Faarax Aadan (Xuseen Dheere) oo kamid ah taliyaashii ciidamadooda kala soo baxay Somaliland ee ku soo biiray Puntland ayaa maanta si heer sare ah loogu soo dhoweeyay magaalada Xiingalool ee gobolka Sanaag.

Taliyaha iyo saraakiil kale oo la socotay ayaa waxaa soo dhowayn diirran ku maamuusay maamulka degmada Xiingalool saraakiisha ciidamada Daraawiishta Puntland ee halkaasi ku sugan iyo boqollaal shacab ah oo  sita calanka Soomaaliya iyo kan Puntland.

Taliyaha oo goob fagaara kula hadlay bulshada Xiingalool ayaa ka mahadceliyay soo dhowaynta loo sameeyay waxaana uu shacabka gobolka sanaag ugu baaqay in ay adkaystaan  difaaca midnimada iyo wadajirkooda.

Sidoo kale mas’uuliyiin iyo waxgarad halkaasi ka hadlay ayaa  bogaadiyay tallaabada ay qaadeen taliyaashii ciidamadooda kala baxay Somaliland kadib markii lagu amray in ay weerar ku qaadaan degmada Badhan ee gobolka Sanaag.

PUNTLAND POST

The post Taliye Xuseen Dheere oo si heer sare loogu soo dhoweeyay Xiingalool appeared first on Puntland Post.