Dowladda Soomaaliya oo jawaab deg deg ah bixisay eedeynta cusub ee KENYA

[Deeq A.]

Muqdisho (Caasimadda Online) – Dowladda Federaalka Soomaaliya ayaa jawaab deg deg ah ka bixisay warbixin uu qoray wargeyska Standard ee laga leeyahay dalka Kenya taasoo lagu sheegay inay Dowladda Soomaaliya deegaannadii ay sahminta shidaalka ka sameysay ay ku darsatay deegaanno ka tirsan Kenya.

Wargeyska The Standard ayaa baahiyay wax uu ku sheegay xog ay baahisay Wasaaradda Batroolka Soomaaliya oo muujinaya in shan ka mid ah Ceelasha shidaalka laga baarayo ay ku yaallaan sohdin badeedda Biyaha ee dalka Kenya.

Waxa uu sheegay Wargeysku in Wasaaradda Batroolka Soomaaliya soo bandhigtay shidaal in laga baarayo 15 toban xirmo oo ku kala yaalla Galmudug, Hirshabeelle iyo Xeebaha Lamu sida ay hadalka u dhigtay Kenya.

Xermooyinka shanta ah ee ay Kenya sheeganeyso ayey ku kala sheegtay xermada 189, 190, 204, 218 iyo 219aad.

Sarkaal ka tirsan Wasaaradda Macdanta iyo Batroolka  Soomaaliya oo la hadlay saxaafadda ayaa sheegay inuu warkaas yahay mid been abuur ah aysana jirin xirmooyin  saliidda Lamu inay dowladda Soomaaliya ku soo dartay sahankii la sameeyay.

” Ma jirto meel ka tirsan Kenya oo lagu soo daray warbixintii la xiriirtay sahanka shidaalka oo ay soo saartay Wasaaradda Macdanta iyo Batroolka Xukuumadda Soomaaliya” ayuu yiri Cabdulqaadir Abiikar oo la hadlay warbaahinta .

Wasaaradda ayaa caddeysay in sahanka Shidaalka ee la sameeyey Soomaaliya uu ku egyahay Xeebaha ku yaal Koonfurta illaa bartamaha oo ku eg Deegaanada Galmudug.

Cabdulqaadir Abiikar ayaa ka digay in Bulshada lagu marin habaabinayo warbixino sida uu warka u dhigay ah kuwa been abuur ah.

Spectrum oo ah shirkaddii sameysay sahanka shidaalka Soomaaliya ayaa horey u beenisay sheegashada dowladda Kenya ee ah in dhulkeeda lagu soo daray sahanka Shidaalka ee laga sameeyey Soomaaliya, waxayna shirkadda si gaar ah usii xustay xataa inaysan sahminta ku jirin aagga hadda lagu muransan yahay ee yaalo Maxkamadda Dambiyada Caalamiga ah.

Caasimada Online
Xafiiska Muqdisho
caasimada@live.com