Aadan Coobbe oo golaha shuurada Al-Shabaab ka tirsanaa oo laga soo dajiyey magaalada Muqdisho

[Deeq A.]

Mudisho (Caasimadda Online) – Sarkaalkii ugu sareeyay ururka Al-Shabab oo ka tirsan Golaha Sare ee Shuurada Alshabaab ayaa isu dhiibay dawladda Soomaaliya ee ku sugan Gobolka Gedo, iyadoo loo duuliyey magaalada Muqdisho.

Sarkaalkan oo lagu magacaabo Aadan Cabdi Maxamed (Aadan Coobbe) ayaa wadahadal kula jiray dowladda Soomaaliya, waxaana la sheegay inuu khilaaf kala dhaxeeyay amiirka iyo madaxda sare ee Alshabaab, taasoo keenay inuu shalay iska dhiibo magaalada Baardheere, iyadoo uu la socday askari ilaalo u ahaa.

Aadan Coobe ayaa xilal kala duwan kasoo qabtay ururka Al-Shabab, waxaana jagooyinkaas ka mid ahaa inuu xubin ka ahaa Golaha Shuurada, waana mas’uulkii ugu heer sareeyay ee muddooyinkan ka goosta Alshabaab.

Waxaa magaalada Muqdisho keentay diyaarad kasoo qaaday magaalada Baardheere, iyadoo ay la wareegtay Hay’adda Nabadsugidda iyo Sirdoonka ee NISA.

Hay’adda NISA ayaa qoraal la soo baxay waxaa lagu sheegay in Horjooge Aadan Goobe oo isu soo dhiibay Ciidan uu soo gaaray magaalada Muqdisho, ee caasimaadad Soomaaliya.

“Waxaa Muqdisho soo gaaray Aadan Coobe, oo ahaa sargaal sare oo muddo dheer ka tirsanaa argagixisada Alshabab, kadib markuu ka dalbaday NISA inay u sahasho sidii uu uga soo goosan lahaa”. Ayaa lagu yiri qoraalkaasi ka soo baxay nabadsugidda Qaranka.

Muddooyinkii ugu dambeyeye waxaa sii kordhayay tirade horjoogayaasha iyo maleeshiyaadka isku soo dhiiba dowladda,kadib markii ay sii kordheen howlgalada lagu baacsanayo,iyadoo qaarna ay fahmeen fikirka qaldan oo ay ka dhaadhiciyeen Al-shabaab.

Caasimada Online
Xafiiska Muqdisho
Caasimada@live.com