Ciidanka Kenya iyo Al Shabaab oo ku dagaalamay J/Hoose

[Deeq A.]

Dhoobley (SMN) – Wararka naga soo gaaraya J/Hoose ayaa ku warramaya in maanta ciidamo ka tirsan kuwa Kenya qarax xoogan lagula eegtay qeybo ka mid ah gobolkaasi.

Qaraxa ayaa waxaa la sheegay in uu haleelay mid ka mid ah kolonyada ay wateen ciidamadaasi, xilli ay marayeen inta u dhaxeysa deegaanada Haawina iyo Jaldeeshe oo ka wada tirsan gobolka Jubbada Hoose ee koonfurta Soomaaliya.

Ciidamada Kenya ee qaraxa miino loo dhigay ayaa ka soo ambabaxay deegaanka Qooqaani, waxaana ay ku sii jeedeen magaalada Dhoobley ee isla gobolkaasi.

Sidoo kale qaraxA kadib ayaa lagu soo warramayaa in dagaal toos ah uu ka dhacay hakaasi, kaas oo u dhexeeyay ciidamada dowladda Kenya iyo Al Shabaab.

Ma cadda khasaaraha dhabta ah ee ka dhashay qaraxani iyo dagaalka xigay intaba mana jiro weli wax hadal oo ka soo baxay labada dhinac.

Weerarkan ayaa ku soo aadaya, xilli saaka gaari siday Qudaar ay miino kula kacday deegaanka Taabta ee G/Jubbada Hoose, kaas oo ay waxyeelo ka soo gaartay dad rayid ah.

View the full article