Mahad Salaad: Sidii Qalbi-Dhagax ayuu Farmaajo u dhiibay badda, wuuna ka tanaasulay dacwaddii”

[Deeq A.]

Muqdisho (Caasimada Onlin) – Xildhibaan Mahad Salaad ayaa ku eedeeyey madaxweyne Farmaajo uu “baddii Soomaaliy beec geeyay kana tanaasulay dacwadii maxkamada caalamiga ah hortaalay”

Qoraal uu soo dhigay bartiisa facebook ayuu ku sheegay in loo xaqiijiyey in ajandaha kulanka labada madaxweyne uu ahaa arrinta muranka badda iyo dacwada hortaala maxkamada caalamiga ah (ICJ).

Qoraalka Mahad Salaad oo dhameystiran hoos ka aqriso.

Ra’iisul Wasaaraha Itoobiya Abiy Axmad ayaa ku guulaystay in uu ku qanciyo Madaxweyne Farmaajo in uu ogolaado in khilaafka Badda ee ka dhaxeeya Soomaaliya iyo Kenya lagu xaliyo wadahadal sida uu baahiyay Teleefishinka Qaranka Itoobiya oo la socday safarka Ra’iisal Wasaaraha Itoobiya uu ku tagay magaalada Niarobi ee dalka Kenya!

Halka Villa Soomaaliya wali ay ku maaweelinayso dadka Soomaaliyeed in kulankii Nairobi looga hadlay oo kaliya xoojinta xiriirka iyo iskaashiga labada dowladood iyo ka wada shaqaynta dhinacyada nabadgelyada, dhaqaalaha iyo isu socodka dadka iyo baayac mushtarka.

Warar sugan oo aan ka helay ilo ka agdhow xaafiiska Madaxweyne Farmaajo waxay ii xaqiijiyeen in ajandaha kulanka labada Madaxweyne uu ahaa arinta muranka Badda iyo dacwada hortaala Maxkamada Caalamiga ah (ICJ) lkn waxay ka gaabsadeen in ay sheegaan go’aamada ay ka gaareen arintaan labada Madaxweyne!

Haddaba, halkaan waxaa ka muuqata in Baddii Soomaaliya la beec geeyay Madaxweyne Farmaajo na ka tanaasulay dacwadii Maxkamada Caalamiga ah hortaalay, Baddii Soomaaliyana u dhiibay sidii shalay uu u dhiibay Abdikariim Qalbi Dhagax!

#SOOMAALIYA_ALLE_AYAA_UMAQAN!
Hon. Mahad Salad