Somaliland Oo Ka Hadashay Kulan Dhex Maray Madaxweyne Biixi Iyo Ra’iisal Wasaaraha Itoobiya

[Deeq A.]

Hargeysa (SMN)- Maamulka Somaliland ayaa qoraalka kasoo saaray booqashada Madaxweyne Biixi uu ku tegay magaalaa Addis Ababa iyo kulamada halkaasi ka socda.

“Somaliland waxa ay uga mahadcelinaysaa Dawladda Federaal-ka iyo shacabka Itoobiya sidii milgaha iyo maamuuska lahayd ee ay u soo dhaweeyeen Madaxweynaha Somaliland, Mudane Muuse Biixi Cabdi iyo weftiga ballaadhan ee uu hogaaminayo oo booqasho rasmi ah ku jooga caasimada dalka Itoobiya ee Addis Ababa.

Somaliland waxa ay soo dhawaynaysaa, lana qabtaa Ra’iisal Wasaaraha Dalka Itoobiya Dr. Abiy Ahmed in Geeska Afrika noqdo meel nabad ah. Dalalka Geeska Afrikana iyadoo mid walba la qadarinayo jiritaankooda dhuleed iyo madax-bannaanidooda qarannimo, in ay iska kaashadaan dhinacyada dhaqaalaha, amniga iyo horumarka mandaqadda.

Shirkii weftiga uu hoggaaminayo Madaxweynaha Somaliland uu la yeeshay Ra’iisal Wasaaraha dalka Ethiopia waxa la isku af-gartay in arrimaha Somaliland iyo Soomaaliya lagu xalliyo wada-hadal iyo fagaare caalami ah, lagana fogaado wax kasta oo keeni kara colaado cusub iyo xasarado hor-leh oo ka curta Gobolka Geeska Afrika, gaar ahaanna Somaliland iyo Soomaaliya oo ay hore u dhex-mareen khilaafyo siyaasideed.

Somaliland waxay ku aas-aasantay go’aan shacbi, waxaanay tixgelinaysaa deris-wanaagga iyo nabad ku-wada-noolaanshaha waddamada deriska ee geeska Afrika iyo kuwa beesha caalamka”.

Madaxweynaha Somaliland Muuse Biixi Cabdi iyo ra’iisal wasaaraha Itoobiya Abiy Ahmed  ayaa kulan ay ku yeesheen magaalada Addis Ababa waxaa diirada lagu saaray sidii meesha looga saari lahaa khilaafka Somaliland iyo Soomaaliya.

Warbaahinta Itoobiya oo wax ka qortay kulankan waxaa ay sheegtay Somaliland in ay aqbashay wada hadal y la yeelato dowlada Somaliya.

The post Somaliland Oo Ka Hadashay Kulan Dhex Maray Madaxweyne Biixi Iyo Ra’iisal Wasaaraha Itoobiya appeared first on Shabelle.

View the full article