Maamulka Dowlad deegaanka iyo Jabhadda ONLF oo kala saxiixday heshiis Taariiqi ah

[Deeq A.]

Jigjiga (Caasimada Online)-Kadib Munaasabad ka dhacday magaalada Jigjiga ee dhulka ismaamulka Soomaalida Ethiopia ayaa waxaa heshiis taariiqi ah ku kala saxiiday dowladda Federaalka Ethiopia iyo jabhadda ONLF.

Heshiiskaasi ayaa waxaa uu ku saleysan yahay in hub ka dhigis lagu sameeyo ONLF, kaasi oo ay goobjoog ka ahaayeen xubno ka socday dowladda Federaalka Ethiopia, xubno matalayay ismaamulka Soomaalida iyo Jabhadda ONLF.

Ciidamada ONLF ee Hubka laga dhigayo waxaa ay tiradoodu gaareysaa 1,740 Qof, kuwaasi oo Hubkooda lagu wareejiyay Ismaamulka Soomaalida, sida lagu sheegay warbixin heshiiska la xiriira.

Sidoo kale waxaa heshiiskaasi qeyb ka ah in ONLF ay qeyb weyn ka ahaato ismaamulka Soomaalida Ethiopia, islamarkaana labada dhinac ka wada shaqeeyaan maamulka ka dhisan Deegaanada Soomaalida.

Ciidanka Hubka dhigista lagu sameeyay ayaa fursad u heysta in ay ka mid noqdaan Ciidanka amaanka ee dowlad degaanka ama in ay noqdaan shaqaalaha dowlad degaanka Soomaalida.

Wararka ayaa sheegaya in xubnaha ONLF ay aqbaleen hub ka dhigista kadib markii laga aqbalay inay ciidamadooda kamid noqdaan ciidamada amaanka, islamarkaana xubno matalaya loo ogolaaday inay maamulka qeyb ka noqdaan.

Caasimada online
Xafiiska Jigjiga
Caasimada@live.com