Dhalashada ninkii Boosaaso lagu dilay oo la ogaaday iyo war kasoo baxay dowladdiisa

[Deeq A.]

Malta (Caasimada Online) – Paul Anthony Formosa oo ahaa madaxii shirkadda DP World ee dekeeda Boosaaso, oo maanta ay dileen kooxda Al-Shabaab ayaa shaaca laga qaaday inuu kasoo jeedo dalka Malta.

Malta waa jasiirad yar oo ku taalla badda Meditareeniyaan-ka una dhow dalka Talyaaniga. Waxaa ku sugan qaxooti badan oo afrikan ah oo Soomaali ay ka mid tahay.

Formosa oo ahaa 52 hir ayaa kasoo jeeda magaalada Marsascala ee dalkaas, waxaana tan iyo bishii August ee 2017 uu ahaa agaasimaha shirkadda P&O oo hoos tagta DP World ee dekedda Boosaaso.

Wasaaradda arrimaha dibedda Malta ayaa xaqiijisay dhalashadiisa iyo geeridiisa, waxayna intaas ku dartay inay si dhow ula socoto xaaladda. Waxay ay sheegtay in dhowaan ay faah-faahin buuxda kasoo saari doonto dilkiisa.

Formosa ayaa horeya uga shaqeyn jiray dekedda Malta Freeport ka hor inta uusan ka tegin. Qoyskiisa ayaa ilaa hadda ka hadlin geeridiisa.

Madaxa dekedda Malta Freeport, Alex Montebello ayaa yiri “Paul waxa uu ahaa shaqaale howl-kar ah, furfuran oo ay jecel yihiin saaxiibadiisa. Aad ayaan uga naxnay inaan ogaanay in la dilay, waxaana tacsi u diraynaa qoyskiisa”

Kooxda Al-Shabaab ayaa sheegatay mas’uuliyadda dilkiisa, ayada oo ku eedeysay inuu diiday digniin ay u dirtay oo ahayd inuu isaga baxo Soomaaliya, oo ay ku doodday inuu si sharci-darro ah ku joogay.

Caasimada Online
Xafiiska Roma
caasimada@live.com