Daacish-ta Soomaaliya oo soo saartay war ku socda dhaqaatiirta ajaaniibta ah ee Soomaaliya ku sugan

[Deeq A.]

Muqdisho (Caasimada Online) – Kooxda Daacish ee ka dagaalanta Soomaaliya ayaa baaq u dirtay dhaqaatiirta Ajaaniibta ah ee ka maqan Somalia iyo kuwa ku sugan, iyaga oo ka codsaday inay ka sameeyaan Soomaaliya adeegyo caafimad oo lacag la’aan ah.

Mid kamid ah xubnaha kooxda Daacish oo laga duubay muuqaal luqadda English-ka ah ayaa wuxuu sheegay in dadka Soomaaliyeed ay u baahan yihiin adeegyo caafimaad oo lacag la’aan ah.

Dadka Soomaaliyeed ayuu sheegay inay u badan yihiin beeralay iyo xoolo dhaqato, sidaasi daraadeed aysan helin adeegyada caafimaad ee aasaasiga ah,waxaana uu sheegay in iyaga markii ay tageen tuulooyinka ay adeegyadaasi u sameeyeen dadka.

Muuqaalka oo soconayay 15 daqiiqo, ayuu ruuxa u hadlay Daacish wuxuu ku sheegay in Soomaaliya looga baahan yahay dhaqaatiirka ku taqasusay Qaliinada, Cudurada Ilkaha iyo cudurada guud.

Wuxuu sheegay markii ay tageen Tuulooyin uusan magacooda sheegin inay dadka ka caawiyeen daaweynta cudurada qaar, wuxuuna sheegay in ku dhawaad 200 oo ruux ay gargaar u fidiyeen.

Ugu dambeyn wuxuu sheegay in maamulada ka jira dalka inaysan tixgelin iyo xiriir wanaagsan aysan la laheyn dadka reer Miyiga oo dhibaato  dhanka caafimaadka ah qaba, waxaana cudurada ugu badan ee haya dadkaasi ku sheegay, Duumada “Malaria”, Shubanka iyo xanuuno kale.

Caasimada Online
Xafiiska Muqdisho
Caasimada@live.com